د عامې روغتيا وزارت سرپرست د سعودي عربستان په جدې ښار کې د میکروب ضد درملو یا انټي بیوټیک پر وړاندې د مقاومت کمولو اړوند کنفرانس څنډه کې د روغتیا نړیوال سازمان له مشر تېدروس ادانوم سره د افغانستان پر روغتيايي سکټور خبرې کړې.
د دغه وزارت ویاند شرافت زمان وايي، کتنه ک په لرې پرتو سیمو کې روغتیایي خدمتونو ته د لاسرسي، د نویو روغتیایي مرکزونو پر جوړولو، له ساري ناروغیو سره پر مبارزې، د میکروب ضد درملو پر وړاندې د مقاومت پر کمولو، په اغېزناک ډول د درملو پر کارونې او همدارانګه په افغانستان کې د پولیو (ګوزڼ) پر مخنیوي خبرې شوې.
زمان زیاتوي:« دغه لیدنه د تېرې لیدنې په تعقیب چې په جینوا کې ترسره شوې وه، د افغانستان له روغتیايي سیسټم سره په مرسته او دغه راز په لرې پرتو سیمو کې د روغتیايي مرکزونو په جوړولو او سپینو ساحو ته د روغتیايي خدمتونو په رسولو خبرې شوې. د عامې روغتیا وزیر مولوي نورجلال جلالي د افغانستان د لرې پرتو سیمو لپاره د نویو روغتیايي مرکزونو جوړولو او همدارنګه د لرې پرتو سیمو د اوسېدونکو لپاره د روغتیايي خدمتونو رسولو، له ساري ناروغیو سره د مبارزې او همدارنګه په افغانستان کې د پولیو ناروغۍ محو کولو لپاره د هڅو خبرې ترسره کړې دي.»
د عامې روغتيا وزارت سرپرست نورجلال جلالي له نړیوالو غوښتي چې د افغانستان د روغتیایي سیسټم ښه والي او د روغتیایي خدمتونو لا معیاري کېدو په اړه دې له افغانستان سره خپلې مرستې روانې وساتي.
زمان په دې اړه وايي:« د عامې روغتیا وزیر د خپلې وینا په ترڅ کې وویل چې موږ هڅه کوو لومړنیو روغتیايي خدمتونو ته د خلکو لاسرسی زیات کړو. په همدې موخه به له خپلې داخلي بودیجې د ولسوالۍ د کچې روغتیايي مرکزونه جوړوو. د دې ترڅنګ یې یادونه وکړه چې نړیوال باید د افغانستان له روغتیايي سیسټم سره دوامداره مرسته وکړي، ترڅو موږ وکولی شو روغتیايي خدمات لا معیاري کړو او باید هر هغه څه ترسره شي چې په افغانستان کې د روغتیايي سیسټم د پراختیا لپاره اړین دي.»
په ورته وخت کې، ډاکټران دغه ډول ليدنې مهمې بولي او له نړیوالو غواړي چې د افغانستان روغتیایي سیسټم د لا پياوړي کېدو په موخه اغېزناک ګامونه واخلي.
ډاکټر نور نبي بشیري وايي: « د روغتیا په اړه کتنې که په هره کچه وي، د دولتونو ترمنځ یا د خصوصي سکټور په کچه یا هم د بهرنیو موسساتو له لارې وي، دا یو نېک ګام دی خو په دې شرط چې دا لیدنې کتنې د مسلکي خلکو، په کارپوهو او تجربه لرونکو کسانو له خوا ترسره شي. د دې کتنو محتوا او طرحه باید مالومه وي، د دې طرحې لپاره باید لازم ګامونه واخیستل شي، بودیجه ورته تصویب شي او دا بودیجه بیا د مسلکي خلکو له لارې په مصرف ورسول شي او و ارزول شي.»
دا ليدنه په داسې حال کې کیږي چې د ملګرو ملتونو د مالوماتو له مخې، لا هم د لرې پرتو ولسوالیو اوسېدونکي کافي روغتیایي خدمتونو ته لاسرسی نه لري او ژوند یې ورځ تر بلې له ګواښونو سره مخ کېږي.
