خیتځ زون کې د غالیو تولیدونکو او صادورنکو ټولنې غړو د یوې خبري ناستې پر مهال خپلې ستونزې له سرپرست حکومت سره شریکې کړې.
دوی وايي، د مرکزي حکومت له خوا د ښار په اتمه ناحيه کې ۱۵۰۰ جريبه ځانګړې شوې ځمکه په واک کې نه ده ورکړل شوې او له همدې امله د کار ځای په برخه کې له ګڼو ستونزو سره مخ دي.
د غالۍ اوبدونکو ټولنې د مشرتابه پلاوي غړی عبد القهار خوشخلق وايي: « زموږ ستونزه دا ده چې د ټولنې جایداد لا هم زموږ په واک کې نه دی راکړل شوی.»
دغالۍ اوبدونکو ټولنې یو بل غړی یوسف افتخار وايي:« موږ د خپلو تولیداتو لپاره مارکېټ نه لرو، بله دا چې په دې برخه کې شته پانګوال او ډونران غیر مسلکي دي، باید دغه کار د مسلکي کسانو له خوا وشي. له اسلامي امارت غوښتنه کوو،چې د غالۍ اوبدونکو لپاره ځانګړې شوې ځمکه دې ژر تر ژره ووېشي.»
د غالۍ تولیدونکو او صادرونکو ټولنې مسوولین د غالیو د پلور لپاره د مناسب بازار نشتون د خپل توليد پر وړاندې جدي ننګونه بولي.
دوی نورو هېوادونو ته د افغاني غالیو د انتقال لپاره د هوايي دهلېز د خلاصیدو غوښتنه کوي.
سوداګر فرید احمد کریمزاده وايي: « موږ له اسلامي امارته جدي غوښتنه کوو، چې د دې صنعت د بېرته پر پښو درولو او له بهرنیو محصولاتو سره د سیالۍ په موخه زموږ ملاتړ وکړي، چې دغه محصول د هوايي دهلېز له لارې ولېږدوي ځکه چې د ځمکنیو بندرونو له لارې یې لږدول ډېر وخت نیسي.»
د ننګرهار ولایتي چارواکي د ستونزو هوارولو ډاډ ورکوي او وايي، اوس مهال سرپرست حکومت خپله ډېره پاملرنه صنعت کارانو ته اړولې او ډېر ژر به د غالۍ تولیدونکو او صادرونکو ستونزو ته په ولایتي او مرکزي کچه رسېدنه وشي.
د ننګرهار ولایت مالي او تامیناتي رییس مولوي احمد حمزه وايي: « د ننګرهار ولایتي اداره ستاسو په چوپړ کې ده. موږ به ستاسو د ستونزو هوارولو لپاره له مرکزه هم د مرستې غوښتنه وکړو.»
ختیځ زون کې د غالیو تولیدونکو او صادرونکو ټولنې مسوولین په افغانستان کې تولید شوې غالۍ د کیفیت له پلوه لوړې ګڼې او زیاتوي، که د دې صنعت ملاتړ وشي، ښايي افغانستان د غالیو د تولید په برخه کې نړیوال شهرت ته ورسوي.
