د رياست الوزرا اقتصادي مرستیالۍ وايي، د تېر کال په پرتله روان کال د سوداګرۍ په کچه کې د پام وړ زياتوالی راغلی.
یادې مرستیالۍ د يوې خبرپاڼې په خپرولو سره ويلي، چې د سوداګرۍ د زياتوالي او پرمختګ لپاره يې روان کال ګڼې اسانتياوې رامنځته کړې دي.
په خبرپاڼه کې پر خامو موادو د تعرفې کمول، د ملي او نړيوال نندارتونونو او د سوداګرۍ خونو جوړول، د هوايي دهلېزونو پرانېستل او نور ګڼ موارد د سوداګرۍ د زياتوالي لاملونه ياد شوي دي.
د خبرپاڼې یوه برخه: « په هېواد کې د سوداګرۍ ودې او پراختیا لپاره لازمې اسانتیاوې رامنځته شوي. له بدیلو سوداګریزو لارو ګټه اخېستل، لکه د صادراتو زیاتوالی، د سوداګرۍ خونو جوړول، پر خامو موادو د تعرفې کمول، د ملي او نړیوالو نندارتونونو جوړول.»
په خبرپاڼه کې د مالياتي جريمو معافيت، په ټرانزيټي برخه کې اسانتياوې، ۲۴ ساعته ګمرکي خدمتونه او د اورګاډي پټلۍ انتقالاتو زیاتوالی هغه مهم فکتورنه یاد شوي، چې د افغانستان د سوداګرۍ کچه يې د پام وړ لوړه کړې.
د خرپاڼې یوه برخه: « معیاري ټرانسپورټ، د لویو لارو بیا رغونه، د توکو کیفیت د کنټرول لپاره د معیاري لابراتوارونو جوړول، د ریل پټلۍ د شبکو بیا رغونه، د مالیاتي جریمو معاف کول او په ګمرکونو کې د ۲۴ ساعته خدمتونو وړاندې کول د سوداګرۍ په برخه کې پرمختګ دی.»
په ورته وخت کې د اقتصادي چارو شنونکی عبدالنصیر رشتیا وايي، د سرپرست حکومت اقتصاد محوره پالیسې د دې سبب شوې چې د هېواد اقتصاد ورځ پر ورځ پرمختګ وکړي.
رشتیا زیاتوي: « له سیاسي تحول او د اسلامي امارت له راتګ وروسته، د اسلامي امارت اقتصاد محوره سیاستونه د دې لامل شول چې دغه برخه چې د له منځه تلو په حال کې وه وژغوري. تر ټولو لویه لاسته راوړنه چې اسلامي امارت یې په دې برخه کې لري له فساد سره جدي مبارزه ده.»
خو ځينې نور بیا د سرپرست حکومت لاسته راوړنې په یاده برخه کې ستایي او زیاتوي چې د هېواد د اقتصاد د لا ودې لپاره حکومت باید کوټلې ګامونه واخلي.
د اقتصادي چارو شنونکی عبدالوارث امیري وايي: « د افغانستان اوسني حکومت ته په کار ده چې د سیمې له هېوادونو سوداګر افغانستان ته راوغواړي، دوی سره په منظم ډول میاشتنۍ ناستې ولري او د همدې ناستو پر بنسټ دوی وهڅوي چې په افغانستان کې پانګونه وکړي، زما په نظر له دې سره اقتصادي پرمختګ لا زیاته وده وکړي.»
د اقتصاد د پرمختګ خبرونه په داسې حال کې خپرېږي، چې څو ورځې وړاندې د کاسا ۱۰۰۰ پروژې د عملې چارو د پيل قرارداد هم د افغانستان په شمول د مشترکو هېوادونو ترمنځ لاسليک شو.
