په هلمند ولایت کې هم د هېواد نورو ولایتونو په څېر بې وزلي او په ټولیز ډول د عامه پوهاوي د کچي ټیټوالی هغه څه دي، چې له امله يي روغتیايي ستونزې زیاتې دي.
د یاد ولایت عامې روغتیا ریاست د ماشومانو د تغذیې مسوول یار محمد ناصري وايي، د دغه ولایت په ۱۶۳ روغتیايي مراکزو کې هره میاشت شااوخوا۱۰ زره تر پنځو کلونو کم عمره ماشومانو چې پر خوارځواکۍ اخته دي درملنه کېږي.
ناصري زیاتوي:« موږ په هلمند کې شااوخوا ۱۰ زره پر خوارځواکۍ اخته ماشومان چې عمرونه له پنځو کلونو کم دي درملنه کوو.»
په کم عمر کې واده، باکيفيته خوړو ته نه لاس رسی، بې وزلي، بې سوادي او د زیږون ترمنځ د فاصلي نه مراعت کول روغتیاپالان تر ډېره د ماشومانو پر خوارځواکۍ د اخته کیدو لاملونه بولي.
روعتیاپال فضل محمد منیب وايي:« هرې مور ته ښه خواړه نه رسېږي. دویم لامل دا دی، چې زموږ خلک عامه پوهاوی نه لري، د بېلګې په ډول یو ماشوم یې چې پیدا شي، ماشوم یو کلن شوی نه وي،چې بل ماشوم د مور په نس وي. نو له یوې مور دوه ماشومان تغذیه کوي.»
دا په داسي حال کې ده، چې د ملګرو ملتونو ماشومانو ملاتړ صندوق (یونېسف) وايي، روان ۲۰۲۳ زیږدیز کال به افغانستان کې ۳.۲ میلیونه ماشومان له خوارځواکۍ سره مخ شي، چې ۸۷۵ زره ماشومان به يي د شدیدې خوارځواکۍ لپاره درملنې ته اړتیا ولري.
په هېواد کې د بې کارۍ او بې وزلۍ د زیاتوالي له امله نړيوالو بنسټونو د لوږې د لوړې کچې اټکل کړی او د د دوامداره بشري مرستو غوښتنه یې کړې.
