Skip to content
د افغان – جاپان روغتون روغتیاپالان وايي،د کورونا ناروغانو په مثبتو پېښو کې بیا زیاتوالی راغلی او هره ورځ شااوخوا د ۲۰۰ شکمنو ناروغانو ټيسټونه اخلي.
د یاد روغتون یو تن روغتیاپال ډاکټر مېړنی بارکزی وايي:« له موږ سره اوس په روغتون کې له ۶۰ زيات ناروغان بستر دي. تقريبا له دوو هفتو زیات وخت کېږي،چې زموږ مراجعين زیات شوي، هره ورځ له يو سل او پنځوسو نيولې تر دوه سوه پورې مريضان مراجعه کوي. موږ له دوی د في سي ار ټيسټونه اخلو او هغه ناروغان،چې ډېر علايم ولري او د دوی د اکسيجن سويه ښکته وي،دغه ناروغان ځان سره بستروو هم.»
د عامې روغتيا وزارت ویاند ډاکټر جاوید هژیر وايي، په تېره يوه اوونۍ کې يې تر ۷ زره زيات د کورونا ټيسټونه اخيستي وو،چې له ډلې يې د ۱۰۹۲ کسانو معاینات مثبت وو.
هژير زیاته کړه:« موږ د تېرې اوونۍ په جريان کې ۷۶۳۲ سيمپلې د کورونا اخيستې وې، ۱۰۹۲ يې مثبت وو.،چې زياتره يې په کابل، ننګرهار او قندهار کې ثبت شوې وې. ۳۶۰ کسان روغ شوي،بېرته او ۱۲ کسان بيا مړه شوي دي.»
د هژیر په خبره، د کورونا د مخنيوي له پاره يې د واکسینو تطبيق لړۍ چټکه کړې او تر اوسه پورې يې په ټول هېواد کې له اته میلیونه زيات کسانو ته واکسین لګول شوی دی.
هژير زیاته کړه:«د واکسینو پروسه ښه روانه ده. په مجموع کې اته میلیونه کسانو واکسین کړي دي. د اسلامي امارت له راتګ وروسته ۳،۶ میلیونه کسانو واکسین کړي دي. هره ورځ ۱۱ زره کسانو ته په ۳۷۷ مرکزونو کې د کورونا واکسین تطبيق کېږي.»
عامې روغتيا وزارت وايي، خلک دې د واکسینو تطبيق برخه کې همکاري وکړي او د کورونا وېروس مخنيوي لپاره دې روغتيايي سپارښتنې عملي کړي.
مسوولین وايي،تر اوسه ورسره د کورونا د نوې اومېکرون بڼې مثبته پېښه نه ده ثبت شوې.
