د مارچ ۱۵ مه؛ له اسلامه د وېرې پر ضد د مبارزې له نړیوالې ورځې سره برابره ده چې هر کال د ملګرو ملتونو او یو شمېر نورو نړیوالو بنسټونو له لوري د اسلام پر وړاندې تبعیض ته د «نه» ویلو او اسلام د سولې دین په توګه وړاندې کولو تر شعار لاندې نمانځل کېږي.
سږ کال هم د ملګرو ملتونو سرمنشي انټونیو ګوتېرېش د دې ورځې په یاد دولتونو او سازمانونو ته څرګندونې وکړې.
ګوتېرېش په خپلو خبرو کې له ملتونو غوښتي چې د برابرۍ، بشري حقونو او انساني کرامت ساتلو لپاره له یوبل سره همکاري وکړي.
هغه زیاته کړې:« هغه تګلارې چې بشري حقونو او وقار ته زیان رسوي، تر هغو پورې چې پر افرادو او عبادت ځایونو ښکاره تشدد کیږي. د اسلام ضد تبعیض یوه پراخه ناروغي ده چې د زغم نه شتون، افراطي ایډیالوژيو او د مذهبي او ځورېدونکو ډلو پر ضد بریدونه په کې شامل دي. کله چې پر یوه ډله برید کېږي، د ټولو حقوق او آزادۍ په خطر کې لوېږي.»
ګوتېرېش همدا راز د نړۍ پر ټولو دولتونو غږ کړی چې پر نړیواله کچه تبعیض ته نه ووایي او په ټولنیزو پاڼو کې یې هم د کرکې خپرولو پرمخنیوي باندې ټینګار کړی.
هغه په دې اړه ویلي: « موږ د یوې نړیوالې ټولنې په توګه باید تبعیض ته نه ووایو او له منځه یې یوسو. حکومتونه باید ټولنیز تړاو ته وده ورکړي او مذهبي آزادۍ خوندي کړي. آنلاین پلیټفارمونه باید د کرکې د خبرو او ځورونو مخه ونیسي. موږ ټول باید د تبعیض، نژاد پالنې او اسلام څخه د وېرونې پر وړاندې غږ پورته کړو.»
ګوتېرېش همدا راز د بشري حقونو، برابرۍ او وقار ساتنې لپاره پر ګډ کار ټینګار کړی.
د سیاسي چارو شنونکي د ګوتېرېش له څرګندونو هرکلی کوي، خو وایي نړۍ لکه څنګه چې باید د مسلمانانو لویې کتلې ته په کتو، دوی ته په نړیوالو سیاسي مسایلو کې ونډه ورکړې وای؛ داسې یې نه دي کړي.
د سیاسي چارو شنونکی معین ګل څمکنی وايي: « په نړۍ کې شاوخوا ۲ میلیارده مسلمانان اوسېږي او دا یوه لویه کتله ده. له بده مرغه دوی ته د نړۍ په سیاسي مسایلو کې هېڅ رول نه دی ورکړل شوی. د امنیت شورا پنځه دایمي غړي هېوادونه او شاید راتلونکي کې هند هم په کې شامل شي، یو هم د مسلمانانو استازیتوب نه کوي. دا یوه لویه نیمګړتیا ده او که چېرې نړۍ غواړي چې له مسلمانانو سره اړیکې عادي کړي، باید امنیت شورا کې د مسلمانانو یو استازی ومني.»
ځینې نور بیا وايي، نړۍ باید پر اسلام مبارک دین د څو افراطي ډلو پر بنسټ قضاوت ونهکړي، بلکې د دوی په خبره اسلام د سولې، برابرۍ او ورورولۍ دین دی او باید اصلي ماهیت ته یې وکتل شي.
د سیاسي چارو شنونکی شهسوار سنګروال وايي: « ګوتېرېش چې کومه خبره کړې، دا ریښتیا ده. د دغو افراطي ډلو په نوم عام وګړي او عام مسلمانان وژل کېږي. دوی د اسلام د بدنامولو لپاره دغه شان تروریستي ډلې جوړې کړې، ترڅو اسلام له نفرت ډک دین وښيي. دا چې ګوتېرېش وايي د مسلمانانو پر وړاندې تبعیض یا داسې یو حرکت لکه اسراییلو چې د فلسطین پر وړاندې وکړ، دا یو حقیقت دی او نړیوال باید په دې پوه شي چې د اسلام دین د عدالت او حقانیت دین دی.»
د اسلام بوفیا یا له اسلامه د وېرې اصطلاح د لومړي ځل لپاره په ۱۹۱۰زېږدیز کال په فرانسه او پنځه اتیا کاله وروسته په ۱۹۹۷زېږدیز کال کې په برېټانیا کې د اسلام ضد کړنو پرمهال وکارېده.
له هغې وروسته هر کال د مارچ ۱۵مه «اسلام د سولې دین» او د اسلام پر ضد تبعیض ته «نه» ویلو تر شعار لاندې د ملګرو ملتونو، دولتونو او ځینو بنسټونو له خوا نمانځل کېږي.
