د روغتیا وزرات مسوولین وايي، د اګسټ په اوولسمه نېته د ماشومانو د ګوزڼ (پولیو) واکسین کمپاین پیل شوی چې موخه یې په دې وروستیو کې د دې ناروغۍ د مثبتو پېښو پر وړاندې بېړنی اقدام دی.
د مسوولانو په خبره، په دې کمپاین کې د پنځو ولایتونو ننګرهار ، کونړ ، کابل ، هرات او فراه اړوند ۳۹ ولسوالیو کې له ۲ میلیونو زیات ماشومان واکسین کېږي.
د مسوولانو په خبره، د ننګرهار په ۱۴ ولسوالیو کې به له زېږون تر ۵۹ میاشتو عمر لرونکو ماشومانو ته د پولیو څاڅکي او له ۴ تر ۵۹ میاشتو عمر لرونکو ماشومانو ته زرقي واکسین تطبیق شي.
د روغتیا وزارت ویاند شرافت زمان وايي: « د دې کمپاین موخه د پولیو ویروس د لا خپرېدو مخنیوی دی. په دې کمپاین کې به د پنځو ولایتونو ننګرهار، کونړ، کابل، هرات او فراه په ۳۹ ولسوالیو کې ۲ میلیونه ۵۸۱ زره ماشومان واکسین شي. د دې کمپاین پرمهال به د ننګرهار په ۱۴ ولسوالیو کې له زېږون تر ۵۹ میاشتو عمر لرونکو ماشومانو ته د پولیو څاڅکي واکسین او له ۴ تر ۵۹ میاشتو لرونکو ماشومانو ته د پولیو زرقي واکسین تطبیق شي.»
د روغتیا وزارت له لوري په یو شمېر ولایتونو کې د پولیو واکسین کمپاین داسې مهال پیلېږي چې روانه اوونۍ په ننګرهار کې پر دې ناروغۍ د اخته کېدو مثبتې پېښې ثبت شوې دي.
د ننګرهار روغتیايي مسوولان وايي، دا مثبتې پېښې وروسته له هغې ثبت شوې چې له پاکستان څخه د افغان کډوالو جبري ستنېدو لړۍ چټکه شوه.
د ننګرهار عامې روغتیا رییس امین الله شریف وايي: « موږ پنځه مثبتې واقعې لرو او کوښښ کوو چې ښه رسیدګي ورته وکړو. زموږ هڅه دا ده چې د پولیو ګراف نور هم راټیټ کړو. موږ خپل پوښښ تر ۹۸ سلنو رسولی و، خو له پاکستان څخه په زور د مهاجرو له شړلو سره په مهاجرو ماشومانو کې مثبتې پېښې ثبت شوې دي.»
پولیو یا ګوزن یوه ویروسي ناروغي ده چې تر ډېره کوچني ماشومان پرې اخته کېږي. دا ویروس د خولې له لارې بدن ته ننوځي، د کولمو له لارې وینې ته رسېږي او پر عصبي سیستم برید کوي.
له هرو ۲۰۰ اخته کسانو یو یې د نه رغېدونکي ګوزڼ(فلج) سره مخ کېږي او له هر لسو فلج شویو کسانو یو د تنفسي عضلو د فلج کېدو له امله ژوند له لاسه ورکوي.
ډاکټر عبدالحق قاضي زاده وايي: « پولیو په ماشومانو کې یوه ساري ناروغي ده چې له پنځو کالو څخه کم عمر لرونکي ماشومان پرې اخته کېږي. دا ناروغي د غذايي موادو او تنفسي لارو څخه هم انتقالېږي، بیا دماغ ته رسېږي او عصبي ريښې تخریبوي.»
روغتیا وزارت مسوولان زیاتوي چې د پولیو په څېر د ټولو هغو ناروغیو پر وړاندې د مخنیوي جدي مبارزه کوي چې د خلکو ژوند ګواښي او خطرونه یې زیات دي. دوی د پولیو واکسین د ښه تطبیق او له احتمالي خطرونو د خوندیتوب په موخه په کلیو او بانډو کې د قومي مشرانو او مخورو همکاري هم اړینه بولي .
