ټاکل شوې د افغانستان کرېکټ ملي لوبډله د روان زېږدیز کال په جون میاشت کې د هند کرېکټ له لوبډلې سره یوه ټېست سیالي او دغه راز د یو ورځینو(پنځوسو اورونو) لوبلړۍ ترسره کړي.
دې لوبو ته د ښه چمتوالي په موخه، افغان لوبغاړو په تمریناتو پیل کړی او زیار باسي چې د هند لوبډلې پر وړاندې ښه وځلېږي.
د کرېکټ شنونکي وايي، د هند لوبډله خورا پياوړې ده او له دې امله چې افغان لوبډله ورسره په دوو مهمو فارمټونو کې مخامخېږي، اړتیا ده چې افغان لوبډله په ټولو برخو کې بشپړ چمتوالي ونيسي.
د دوی په خبره، لوبغاړي زیات وخت لري او باید د توپ اچونې، توپ وهنې او ډګر ساتنې په برخو خپلې نیمګړتیاوې پوره کړي.
د کرېکټ شنونکی عبدالمالک شینواری وايي: « د هند ټیم د نړۍ له غوره ټیمونو څخه یو دی. افغانستان باید دې سریز ته سخت چمتوالی ولري او په هره برخه کې ځانونه ښه چمتو کړي.»
له بلې خوا، د ملي لوبډلې روزونکي وايي، له هند سره د لوبو لپاره يې له کابل وروسته په ننګرهار کې هم لوبغاړو ته تمریناتي کمپ په پام کې نیول او هلته له پېچ یا ویشتنځای نیولې تر توپوهنې پورې ټول امکانات برابر شوي دي.
د کرېکټ ملي لوبډلې روزونکی نوروز منګل وايي: « موږ دا ځل ګرین پېچونه یا واښه لرونکي پېچونه چمتو کړي او دواړه لوبغاړي که توپ وهونکي دي یا توپ اچوونکي، خوند ترې اخلي. همدارنګه موږ دوی ته هغه بال هم راوړی چې په هندوستان کې ټېسټ لوبه ورباندې کېږي، ځکه دا بال په نورو هېوادونو کې توپير لري. دا د ټولو لوبغاړو لپاره ښه فرصت دی چې ښه وځلېږي.»
د دوی په خبره، له سخت تمرین او چمتوالي وروسته لوبغاړو خپلمنځیو لوبو کې ښودلې چې په توپ اچونې، توپ وهنې او ډګرساتنې کې ډېر ښه شوي او تمه ده چې د هند له لوبډلې سره په لوبو کې ښې لاسته راوړنې ولري.
د ملي لوبډلې مرستیال روزونکی رییس احمدزی وايي: « زموږ تېزو توپ اچوونکو هم ښه بالېنګ وکړ او په سمو ځایونو کې یې توپونه ووېشتل. بله خبره دا ده چې په فېلډېنګ کې هم ورسره ښه والی راغلی. موږ تمه لرو چې را روان سریز کې ښه نتیجه ترلاسه کړو.»
د کرېکټ ملي لوبډله به د راتلونکې جون میاشتې په ۶ نېټه په چندیګړ کرېکټ لوبغالي کې د هند له لوبډلې سره ټېست لوبه ولري او همدا راز به د یو ورځنیو لوبو سیریز د همدې میاشتې په څوارلسمه نېټه پیل شي چې لومړۍ لوبه به يې درمشاله، دویمه په لکنو او درېیمه به یې په چینای کې ترسره شي.
