د افغانستان کرېکټ بورډ او د غیر الکولي څښاک توکو تولیدوونکې سوپرکولا کمپنۍ ترمنځ د کرېکټ ملي لوبډلې مالي ملاتړ هوکړه لاسليک شوه.
د دې هوکړې له مخې به سوپرکولا کمپنۍ د ۲ کلونو لپاره د افغانستان کرېکټ کورنیو لوبو او په نړيوالو لوبو کې د ملي لوبډلې مالي ملاتړ کوي.
د کرېکټ بورډ چارواکي وايي، د لاسلیک شوې هوکړې له مخې به یاده کمپنۍ له هېوادونو سره د افغانستان ټولو دوه اړخیزو لوبلړیو او همداراز نړیوال ټورنمنټونو کې مالي ملاتړ کوي.
د افغانستان کرېکټ بورډ اجراییه رییس نصیب خان وايي: « موږ نن له سوپرکولا سره دوه کلن قرارداد وکړ او په راتلونکو دوو کالو کې به ټولو لوبو کې سوپرکولا له موږ سره وي. په دې مالي ملاتړ کې کورنی کرېکټ او د ملي لوبډلې ټولې نړیوالې لوبې شاملې دي.»
په همدې حال کې د سوپرکولا کمپنۍ چارواکي په هېواد کې د ټولو ورزشونو او په تېره بیا د کرېکټ مالي ملاتړ خپل مسوولیت بولي او وايي، دوی به په راتلوونکو ۲ کلونو کې له کرېکټ سره اوږه په اوږه مخته لاړ شي.
د سوپرکولا کمپنۍ اجراییوي رییس شهاب قناوزیان وايي: « موږ وینو چې د افغانستان کرېکټ د نړۍ په ټولو میدانونو کې ځلېږي او په نړیواله کچه ښه دريځ لري. موږ د یوه افغان شرکت په توګه خپله دنده ګڼو چې د کرېکټ او ورزش ملاتړ وکړو.»
د کرېکټ په نړیوالو میدانونو او ټورنمنټونو کې د افغان لوبډلې ځلېدل او سترو لوبډلو ته په ماتې ورکولو سره اوس د سوداګریزو کمپنیو ترمنځ ګرم بازار لري او هره ستره کورنۍ او بهرني شرکتونه هڅه کوي چې د افغانستان کرېکټ ملي لوبډلې مالي ملاتړ ترلاسه کړي.
