افغان ۱۹ کلنو کرېکټ لوبډلې د روانې درې اړخیزې لوبلړۍ په خپله څلورمه لوبه کې د متحده عربي اماراتو لوبډلې ته د ۸ ویکټو په توپیر ماتې ورکړه او د دغې لړۍ خپله درېیمه بریا یې هم د افغانستان په نوم کړه.
په دې لوبه کې د متحده عربي اماراتو لوبډلې د ټولو لوبغاړو په سوځېدو سره ۸۹ منډې وکړې، خو افغان لوبډلې په ۲۱.۲ اوورونو کې ټاکلی هدف ترلاسه او لوبه يې وګټله.
د افغانستان کرېکټ بورډ ویاند سید نسیم سادات وايي: « د افغانستان له ۱۹ کالو کم عمره ملي لوبډلې د درې اړخیزه لوبلړۍ په درېیمه لوبه کې د متحده عربي اماراتو له ۱۹ کالو کم عمره لوبډلې ته ماتې ورکړه. دوی وکولی شول چې په دې بریا سره له خپلو څلورو سیالیو دری سیالۍ وګټي او پایلوبې ته لاره پيدا کړي.»
له دې سره، ټاکل شوې د ۱۹ کلنو کرېکټ ملي لوبډله د سې شنبې په ورځ د پاکستان ۱۹ کلنو له لوبډلې سره د لوبې لپاره ميدان ته ښکته شي.
د کرېکټ بورډ ویاند وايي: « افغان نو۱۹ کلنه لوبډله به د سه شنبې په ورځ چې د نومبر میاشتې ۲۶ نېټه کېږي، په پایلوبه کې له پاکستان سره د سیالۍ ډګر ته ښکته شي.»
د کرېکټ بورډ ویاند د افغانستان، پاکستان او عربي متحده اماراتو ترمنځ روانه دری اړخیزه لوبلړۍ د افغان لوبډلې د چمتوالي لپاره مهمه بولي او زیاتوي، ټاکل شوې له دې لوبلړۍ وروسته افغان لوبډله د ۱۹ کلنو په آسیا جام کې ګډون وکړي.
سید نسیم سادات وايي: « په ټوله کې دغه لوبلړۍ د افغانستان له ۱۹ کالو کم عمره لوبډلې لپاره ډېره ښه لوبلړۍ وه او په هره برخه کې ښه چمتوالی ترسره شو. زموږ ځوانان په توپ اچونه، توپ وهنه او توپ ټولونه کې ښه وځلېدل. له دې لوبلړۍ وروسته د ۱۹ کلنو آسیا جام سیالۍ پيل کېږي او د افغانستان لوبډله به هم په کې ګډون کوي.»
ټاکل شوې ده چې د ۱۹ کلنو آسیا جام سیالۍ د نومبر میاشتې پر ۲۹مه نېټه پیل او د ډسمبر تر اتمې دوام وکړي.
