په خیبرپښتونخوا او بلوچستان کې د ناامنۍ له زیاتېدو او د پاکستاني پوځ ضد وسلهوالو بریدونو له شدت وروسته، دا ځل د دې هېواد په مرکزي سیمه کې پوځي مرکز په نښه شوی.
تازه برید د سند ایالت کراچۍ ښار اړوند د رنجرز نیمه پوځيانو پر مرکز شوی چې د پوځ د تایید شویو شمېرو له مخې په کې درې تنه وژل شوي او څلور نور ژوبل شوي دي.
له برید وروسته د پوځ په اعلامیه کې راغلي، بریدګرو له موټر بمب برید وروسته مرکز کې دننه له پوځیانو سره جګړه کړې.
اعلامیه کې دغه برید هند ته منسوب شوی او ویل شوي چې جماعت الاحرار ډلې ترسره کړی او له برید وروسته پوځ په شاوخوا سیمو کې چاڼیزعملیات هم ترسره کړي دي.
د پاکستان پوځ اعلامیه کې راغلي: « له بریدګرو سره په نښته کې درې پوځیان وژل شوي او څلور نور ژوبل شوي دي.»
یو شمېر نورې کره سرچینې بیا دا شمېرې ناسمې او تر دې زیاتې ګڼي. د راپورونو له مخې، په دې برید کې لږ تر لږه ۱۰ پاکستاني پوځیان وژل شوي او ګڼ نور ژوبل شوي دي.
د تحریک طالبان پاکستان(ټيټيپي) اړوند جماعت الاحرار څانګې د دې برید مسوولیت منلی او وايي، پر رنجرز پوځي مرکزعملیاتو کې یې نهو کسانو برخه لرله.
د چارو شنونکی معینګل څمکنی وايي: « دا څرګندوي چې د پاکستان امنیتي وضعیت تر کومه حده پېچلی او ژور شوی. پاکستان دعوه کوي چې ټيټيپي له افغانستان راځی او خیبرپښتونخوا کې عملیات کوي، خو سند ایالت له فرضي کرښې ډېر لرې دی او دا چې هلته هم امنیتي پېښې کېږي، دا د پاکستان د پوځ ضعف او د نا امنیو پراختیا څرګندوي.»
شنونکي دغه راز وايي، د کراچۍ په څېر د پاکستان په مرکزي سیمو کې د ټيټيپي برید که له یوې خوا ډیورند فرضي کرښې پورې غاړې ته د تحریک طالبان پاکستان په ګډون د ګڼو وسلهوالو ډلو پراخ نفوذ ښيي، له بلې خوا پر هغو ادعاوو هم د بطلان کرښه راکاږي چې وايي په خیبر پښتونخواه او بلوچستان کې بریدونه له افغانستانه د پاکستان ضد وسلهوالو د اسانه اووښتو له امله ترسره کېږي.
دوی له کرښې شاوخوا یو نیم زر کیلومټره لرې د پاکستان په خاوره کې دننه، دا ډول دقیق او پلان شوي عملیات په پاکستان کې د وسلهوالو د پراخ فعالیت او د پلانونو پلي کولو د انسجام نښه ګڼي.
د پوهنتون استاد فیضمحمد ځلاند وايي: « داسې ښکاري چې د پاکستان نا امنۍ ورځ تر بلې پراخېږي او له خیبرپښتونخوا څخه سند او بیا پنجاب ته رسېږي. دا هرڅه د پاکستان د داخلي کمزورۍ او بې ثباتۍ نتیجه ده. دا چې پاکستان د خپلې نا امنۍ پړه کله پر افغانستان او کله د سیمې په نورو هېوادونو اچوي، دا د ملامتۍ یوه لوبه ده.»
د پاکستان په سټراټیژیکو او له امنیتي اړخه په شدت ساتل شویو ساحو کې د بریدونو ترسره کېدل دا ښکاره کوي چې سره له دې چې په خیبر پښتونخواه او بلوچستان کې د امنیتي وضعیت مهارېدل نږدې له کڼټروله وتلي، ورسره د ناامنۍ لمن اوس د دې هېواد مرکزي او مهمو سیمو ته هم خپره شوې ده.
