د پاکستان لنډمهالي لومړي وزیر انوارالحق کاکړ په خپلې یوې تازه مرکه کې ویلي، له ټي.ټي.پي سره له مذاکراتو انکار نه کوي خو د مذاکراتو له پیل وړاندې دې خپلې وسلې پرځمکه کیږدي.
کاکړ زیاته کړې، کله چې ټي.ټي.پي خپلې وسلې وغورځوي نو له هغې وروسته بیا پریکړه کوي چې له دوی سره خبرې وکړي او کنه.
کاکړ خبر داری ورکړی که چیرې ټي.ټي.پي غواړي د وسلې پر مټ له دوی سره مذاکرت وکړي نو دا ورته د منلو نه ده او امکان یې هم نشته.
کاکړ زیاته کړې:« موږ په ټوله کې له ټي.ټي.پي سره له مذاکراتو او خبرو انکار نه کوو. که دوی غواړي له حکومت سره واقعي مذاکرات وکړي، نو له قید اوشرط پرته دې خپلې وسلې پر ځمکه کېږدي. د ټي.ټي.پي داسې شرایط نه منل کیږي، چې غواړي لومړی دې د دوی شرایط ومنل شي او بیا به وسلې کېږدي. له هغې وروسته چې ټي.ټي.پي وسلې پر ځمکه کېږدي، نو بیا موږ دا پرېکړه کوو، چې له دوی سره مذاکرات وکړو او که نه؟ او که خبرې هم کوو نو تر کومه حده به وي؟»
د پاکستان لنډمهالي لومړي وزیر دغه څرګندونو د امریکا هغو شعارونو په څیر یادیږي چې په افغانستان کې یې د افغان طالبانو پر وړاندې ورکول.
د سیاسي چارو کارپوهان وايي، د پاکستان دغه موقف چې ټي.ټي.پي پر وړاندې لري دا به پاکستان له یوې سختې کورنۍ جګړې سره مخ کړي چې بیا به یې مهار ستونزمن کار وي.
د سیاسي چارو کارپوه نجیب الله جامع وايي: « د پاکستان طالبانو خوځښت د پاکستان حکومت د ۷۶ کاله جبر، وحشت او پر پښتني خاوره د پاکستان استخباراتي جګړو د تپلو پر وړاندې یو ملي او ولسي غبرګون دی. که د پاکستان حکومت وايي دوی(ټي.ټي.پي) دې تسلیم شي یا به وژل کېږي دا هغه شعار دی چې امریکا افغانستان کې هم ورکړی وه. دا هغه شعار دی چې اسرائیل یې د حماس پر وړاندې ورکوي. دا ډول ظالمانه شعارونه تل محکوم کېږي، ملتونه کامیابېږي. زه په دې باور یم چې د پاکستان حکومت به دوی سره خبرې ته حاضر کېږي یا به د پاکستان حکومت یوې کورنۍ جګړې ته داخلېږي.»
ځینې نور بیا وايي، ښه به دا وي چې پاکستان له خپلو وسله والو طالبانو سره په هغو مواردو توافق وکړي چې د ټي.ټي.پي له لوري د شرایطو په توګه وړاندې کیږي.
دوی په دې باور دي چې له دې پرته به پاکستان د تاریخ په دې حساس پړاو کې له سختو ستونزو سره مخ شي.
په دې وروستیو کې پاکستان کې ناامني زیاته شوې، پر پولیسو او پوځ یې بریدونه کیږي چې د راپورونو له مخې، د تیر کلونو په پرتله په پاکستان کې د چاودنو سلنه څو برابره لوړه شوې ده.
