د کابل اړوند الوخېلو سیمه کې د کرېکټ د یوه نړیوال او معیاري لوبغالي جوړولو چارې رسماً پیل شوې.
د کرېکټ بورډ چارواکو په خبره، یاد لوبغالی به د ۴۵ ميليون ډالرو په لګښت په ۸۶ جرېبه ځمکه جوړ او په راتلونکو شپږو کلونو کې به په بشپړه توګه ګټه اخستنې ته وسپارل شي.
د کرېکټ بورډ انجنیرۍ څانګې مسوول ممتاز عمرزی وايي: « له دې لوبغالي سره دوه نور فرعي لوبغالي هم شته چې یو پوړ لوړوالی او د لیدونکو لپاره په چمنونو پوښلي ځایونه ولري.»
ځينې حکومتي چارواکي ډاډ ورکوي چې حکومت د ورزشي ستونزو حلولو ته ژمن دی او هر اړخيز ملاتړ یې کوي.
دوی دغه راز په بهر کې له مېشت افغان بانګوالو غواړي چې په کور دننه پانګونه وکړي او په دې توګه د هېواد په ابادۍ کې ونډه واخلي.
د ریاست الوزرا د دفتر ریيس عبدالواسع خادم وايي: « موږ خپلو ټولو هېواد مېشتو او بهر مېشتو پانګوالو او تاجرانو ته ډاډ ورکوو چې د امنیت ترڅنګ، ټول امارتي چارواکي چمتو دي چې تاسو ته د خدمت زمینه برابره کړي.»
بله خوا، د کرېکټ بورډ چارواکي وايي، په الوخېلو کې جوړېدونکی لوبغالی به پر نړیوالو معیارونو برابر وي او په خبره يې هڅه کوي چې راتلونکي کې په ځینو مرکزی ولایتونو کې هم څلور ورته لوبغالي جوړ کړي.
د کرېکټ بورډ رییس میرویس اشرف وايي: « که د دې لوبغالي ارزښت ته وګورو، له همدې ډول لوبغالو څخه د راشد خان په څېر ستوري د نړۍ تر مشهورو لوبغالو رسېدلي او موږ به هڅه کوو چې له دې ځایه د هغه په څېر ډېر ځوانان و روزو.»
چارواکو د کرېکټ لوبغاړو وروستۍ لاس ته راوړنې وستایلې او ډاډ یې ورکړ چې اسلامي امارت به له خپل وس سره سم، د پرمختګ لپاره ټولې اسانتیاوې برابرې کړي.
