د ایران اسلامي انقلاب ساتونکي ګارد(سپاه پاسداران) ویلي، ځواکونو یې هغه پوځي اډه په نښه کړې چې د ایران په جنوب کې یې د مخابراتو پر تاسیساتو باندې د امریکا برید پیل کړی و.
کوېټ چې د امریکا د پوځي اډو کوربه توب کوي، د دوشنبې په ورځ ایران په دې تورن کړ چې د دوی په خپله خاوره کې د بریدونو نوې څپه پیل کړې، مګر دا یې تایید کړې نه ده چې ایا یوه اډه په نښه شوې ده.
دا خبره اوسمهال روښانه نه ده چې وروستي بریدونه به د جګړې د پای ته رسولو په خاطر د متحده ایالاتو او ایران ترمنځ پر خبرو اترو باندې څه اغېز وکړي که نه؟
د نیویارک ټایمز د راپور یوه برخه کې راغلي: « د جګړې د پای ته رسولو لپاره خبرې اترې په ناڅاپي ډول پرمخ تللې دي او ولسمشر ټرمپ د ډېپلوماسۍ د حالت په اړه متضاد بیانونه خپاره کړي. په مې میاشت کې، ښاغلي ټرمپ وویل چې وروستۍ موافقه ډېر نږدې وه. تېره اوونۍ له خبرو اترو سره بلدو چارواکو وویل چې د متحده ایالتونو او ایران مذاکراتو کې په یوه سند موافقه شوې وه چې د دواړو هېوادونو مشرانو ته د تصویب لپاره لېږل شوی وه.»
بله خوا، نیویارک ټایمز ورځپاڼې لیکلي، دا روښانه نه ده چې د ایران ستر مذهبي مشر مجتبی خامنه یي به وړاندیز ته ځواب ورکړي او که نه.
خو د امریکا ولسمشر ډونالډ ټرمپ د تړون شرایط سخت کړي دي، ایران ته یو تعدیل شوی سند لېږلی. د درېیو چارواکو په خبره، د نوم نه ښودلو په شرط یې خبرې وکړې.
د نیویارک ټایمز ورځپاڼې راپور کې زیاته شوې: « د جمعې په ورځ، ښاغلي ټرمپ په عامه توګه ژمنه وکړه چې د سپینې ماڼۍ د وضعیت په خونه کې د لوړ پوړو مرستیالانو سره له دوه ساعته غونډې وړاندې به د دې معاملې په اړه “وروستي پریکړې” ته ورسیږي. خو یوه امریکایي چارواکي وروسته وویل، غونډه پرته له کومې پرېکړې پای ته ورسېده.»
د امریکا مرکزي قوماندنۍ(سنټکام) وايي، امریکايي ځواکونو د اوونۍ په پای کې د ایران په جنوب کې د پوځي اهدافو پر وړاندې بریدونه ترسره کړي دي.
په لبنان کې د جګړې پيل هم د ایران او امریکا د جګړې پای ته رسولو هڅې او موافقې ته د رسېدو چارې پېچلې کړې دي.
ایران غوښتنه کړې چې په لبنان کې د اسراییلو او حزب الله ترمنځ اوربند چې د ایران له ملاتړ برخمنه ډله ده، باید د پخوانیو خبرو اترو د یوې برخې په توګه پلې شي.
