په وروستیو څو میاشتو کې د پاکستان او د دې هېواد د پوځ تر کنټرول لاندې سیمو کې سیاسي او امنیتي ثبات تر بل هر وخت کړکېچن او ستونزمن لور ته روان دی.
د دې ننګونو او ستونزو په لړ کې، امریکا پرېکړه کړې چې په خیبر پښتونخوا کې خپله کونسلګري د امنیتي دلایلو له امله وتړي. بهرنیو چارو وزارت يې د دې پرېکړې موخه د ډېپلوماټانو خونديتوب او د سرچینو اغېزناک مدیریت بللی.
د دې وزارت اعلاميې له مخې، د ډېپلوماټانو امنیتي خونديتوب او سرچینو د مدیریت لپاره به خپل ډېپلوماټیک مسوولیت په پړاویزه بڼه د پاکستان په پلازمېنې اسلام اباد کې خپل سفارت ته انتقال کړي.
د امریکا بهرنیو چارو وزارت ویلي: « موږ به خپل مهم ډېپلوماټیک کار د خیبرپښتونخوا له خلکو او چارواکو سره په همکارۍ مخته وړو. هلته به خپلې اقتصادي اړیکې پیاوړې او د امنیت په لا ښه کېدو کې به مرسته وکړو. موږ هڅه کوو چې له خیبرپښتونخوا سره نږدې او همکار پاتې شو.»
موده مخکې هم داسې راپورونه ورکړل شول چې امریکا به د ناامنۍ زیاتېدو له امله په پېښور کې خپله کونسلګري په بشپړه توګه وتړي. بله خوا، د چارو څارونکي بیا باوري دي چې په خیبرپښتونخوا کې د امنیتي پېښو زیاتوالي په صورت کې ښایي نور هېوادونه هم ورته اقدام کولو ته اړ شي.
پخوانی ډېپلوماټ عزیز معارج وايي: « دا چې کله کله کورني کړکېچونه او ځینې مسایل رامنځته کېږي، دا دوی په عمدي ډول کوي. د مثال په توګه، یوځل بلوڅان راپورته شول، بلوا یې جوړه کړې، دوی په دې وخت کې د ایران لپاره ځینې وسایل ځای پرځای کړل، خو اوس هرڅه آرام دي او وضعیت کنټرول دی. کله نا کله همدا پښتانه راپورته شي. په خواشینۍ سره دا ډول لوبې هم اکثریت د پښتنو او بلوڅو په سیمو کې کېږي مګر سند او پنجاب ترې ځان ګوښه کړی.»
د سياسي چارو شنونکی ادريس محمدي ځاځی وايي: « په ټول پاکستان او په ځانګړې توګه بلوچستان او پښتوخوا کې امنیت ورځ تر بلې خرابېږي، قومونه سره وېشل کېږي او د حکومت او خلکو ترمنځ واټن زیاتېږي؛ دا هغه څه دي چې عاصم منیر او نور یې باید ومني.»
د چارو څارونکي وايي، که څه هم د امریکا دا پرېکړه د سرچینو د اغېزناک مدیریت په موخه شوې، خو په خبره يې اصلي لامل یې په خیبرپښتونخوا کې مخ پر زیاتېدونکی خراب امنیتي وضعیت دی.
دا په داسې حال کې ده چې له تېرو څو کلونو راهیسې په خیبر پښتونخوا او پاکستان کې ناامني په بېساري توګه زیاته شوې او پر پاکستاني پوځیانو خونړي بریدونه ډېر شوي دي.
د پوځي چارو شنونکی اخترمحمد راسخ وايي: « پاکستان ځان په نړۍ کې د تروریزم له ادرسه زیانمن ښيي، خو اساسي ټکی دا دی چې دوی د ترهګرو زیږوونکي او روزنکي دي او دا یې سټراټيژي ده چې په وسیله یې سیمه نا امنه ساتي.»
د یادولو وړ ده چې د سېشنبې په ورځ هم په پېښور کې د مولانا محمد ادریس په نوم ديني عالم د وسلهوالو له خوا په ډزو ترور شو او وروسته یې مسوولیت د داعش ډلې ومانه.
بله خوا، په پاکستان کې د یو شمېر ګوندونو غړیو پرحکومت نیوکې کړې او د دې ناامنۍ لامل یې د دوی اوسنۍ پالیسي ګڼلې چې د ترهګرۍ پر تمويل او تجهيز ولاړې یې بللې دي.
