د پاکستان کورنیو چارو وزارت په دې هېواد او خيبرپښتونخوا کې د تېرو لسو میاشتو امنیتي وضعیت او هلته د شویو وسله والو بریدونو او اوښتو زيانونو په اړه راپور خپور کړی.
په راپور کې راغلي، د وسله والو له لوري په خیبرپښتونخوا، بلوچستان، اسلام اباد او د پاکستان په یو شمېر نورو سیمو کې د بریدونو له امله د امنيتي ځواکونو په ګډون له ۳زرو زیاتو کسانو ته مرګ ژوبله اوښتې.
د راپور په یوه برخه کې راغلي: « په تېرو لسو مياشتو کې د ټول پاکستان پر کچه ۱ زر۵۶۶ وسله والې او امنيتي پېښې رامنځته شوې چې له امله یې ۹۲۴ تنه وژل شوي او ۲ زره ۱۲۱ تنه نور ټپیان شوي دي. په وژل شویو کسانو کې ۵۷۳ پوځیان هم شامل دي او ۳۵۳ نور ټپیان دي. همدارنګه ۳۵۱ ملکي کسان وژل شوي او ۷۶۸ نور ټپیان دي. د بریدونو له دې جملې ۹۴۸ پېښې په خیبرپښتونخوا، ۵۳۲ په بلوچستان، ۲۴په سند،۱۰ په پنجاب او ۲ پېښې هم پلازمېنه اسلام اباد کې شوې دي.»
د پاکستان کورنیو چارو وزارت په راپور کې ادعا شوې چې له افغانستانه د امریکايي ځواکونو له وتلو او د اسلامي امارت له واکمنېدو سره سم، تحریک طالبان پاکستان(ټي.ټي.پي) په ټول پاکستان کې خپلو بریدونو ته زور ورکړی.
همدارنګه، پاکستاني چارواکو په افغانستان کې امریکايي وسلو ته د ټي.ټي.پي لاسرسی او په افغان خاوره کې د وسله والو خوندي مرکزونه په پاکستان کې د پراخو بریدونو یو لوی لامل بللی دی.
د پاکستان کورنیو چارو وزارت ویلي: « د ټي.ټي .پي مشران په افغانستان کې اوسېږي او له هغه ځایه د پاکستان ثبات او امنیت ننګوي. د افغانستان په جګړې کې د افغان طالبانو بریا ټي.ټي.پي ته جرئت ورکړ چې په پاکستان کې خپل بریدونه پراخ کړي. دوی اوس د خپلو بریدونو ستراتیژي بدله کړې او تر ډېره پر سترو امنیتي مرکزونو او قضايي محاکمو متمرکز دي.»
د پاکستان د کورنیو چارو وزارت د تازه شمېرو او راپور کې شویو ادعاوو په اړه د سرپرست حکومت مسوولانو غبرګون نه دی ښودلی، خو له دې وړاندې سرپرست حکومت په کراتو ویلي چې په پاکستان کې ناامني د دې هېواد کورنۍ مساله ده او په افغانستان پورې تړاو نه لري.
همدا دوه ورځې وړاندې د افغانستان بهرنيو چارو وزارت سرپرست مولوي امیر خان متقي وویل، په تېرو اوو مياشتو کې د داعش له لوري ترسره شوي شپږ خونړي بريدونه د افغانستان له پولو د باندې پلان شوي وو.
د پاکستان کورنيو چارو وزارت دغه راپور داسې مهال خپروي چې دوه ورځې وړاندې د پاکستاني طالبانو تحریک په یوه تازه اعلاميه کې ویلي، دوې میاشتې وړاندې یې د پاکستان امنیتي پرسونل ته سپارښتنه کړې وه چې خپلې دندې پرېږدي، خو اوس دغه موده پای ته رسېدلې.
د تحریک طالبان پاکستان په اعلامیه یوه برخه: « دوه میاشتې وړاندې د ټي.ټي.پي مشرتابه د ټولو امنیتي ادارو کارکوونکي وهڅول چې خپلې دندې پرېږدي او د ژوند تېرولو لپاره حلالې لارې چارې ومومي. د ټاکل شوې نېټې له پای ته رسېدو سره سم، ټولو مجاهدینو ته سپارښتنه کېږي چې ور سپارل شوې لارښوونې عملي کړي او همداراز که د پاکستان امنیتي ادارې د ټي.ټي.پي مجاهدینو له کورنیو سره هر ډول ناوړه چلن وکړي، پر وړاندې به یې ورته اقدام ترسره شي.»
د سیاسي چارو کارپوهان وايي، پاکستان له پښتنو، بلوڅانو او نورو قومونو سره د دوه مخي او ناوړه چلن پایلې تجربه کوي.
د دوی په خبره، په افغانستان کې څو لسیزو ناخوالو دا ښودلې چې پاکستان هېڅکله د افغانستان سره په ګاونډیتوب کې صادق نه دی.
د سیاسي چارو کارپوه توریالی ځاځی وايي: « افغانستان به له نیمې پېړۍ راهیسې د دغو غمیزو، ناروا جنایتونو او بدبختیو سره نه وای مخامخ. بدبختانه باید ووایم چې موږ ډېر بد ګاونډیان لرو لکه ایران او په ځانګړې توګه پاکستان. پاکستان په تېرو څو لسیزو کې په افغانستان کې ډېر زیات ناروا جنایتونه ترسره کړي. د دغه جنایت کار هېواد په خبرو او نیوکو باندې که دا د دوی د بهرنیو چارو وزارت له خوا وي یا د سیاسیونو له خوا، پرې باور کول زموږ لویه تاریخي تېروتنه ده.»
د سیاسي چارو کارپوه محمد زلمی افغانیار وايي: « دا چې د پاکستاني طالبانو تحریک(ټي.ټي.پي) د پاکستاني نظامیانو لپاره داسې پیغام لري چې ورسره به بالمثل چلن وکړي، ښکاره خبره ده چې دا د دوی د کورنیو ستونزو پر بنسټ دي؛ ځکه چې د پاکستان د نظامیانو له خوا پر عامو وګړو او ځانګړې توګه د ډېورېنډ تحمیلي کرښې پورې غاړه ولسونو باندې په مختلفو نومونو ډېر زیات ظلم کېږي. زه هیله لرم د پاکستان حکومت خپلو کورنیو ستونزو ته د خبرو له لارې حل پیدا کړي او په هغو معضلاتو کې د افغانستان د ښکېلولو هڅه ونه کړي چې په دې هېواد کې پېښېږي، دغه راز نباید افغانستان ته د ټي.ټي.پي د ملاتړ ګوته ونیول شي.»
د پاکستان کورنیو چارو وزارت په تازه خپور شوي راپور کې دا هم راغلي چې د دې هېواد امنیتي ځواکونو په څه باندې ۲۸۰۰ځانګړو عملیاتو کې ۳۴۱ وسله وال وژلي دي.
