د پاکستان ماليې وزارت ځينو سرچينو رسنيو ته ويلي، سرپرست حکومت د ۲۰۲۵زېږدیز کال له جولای د ۲۰۲۶ کال تر جولای پورې په بوديجه کې د جدي کسر له امله د لوړو مالياتو راټولولو نوې تګ لاره تعقيبوي.
اېکسپرېس ټرېبیون ورځپاڼې د يادو سرچینو له قوله راپور ورکړی چې حکومت د بودیجې کسر کمولو لپاره پر مالیه ورکوونکو د مالیې اندازه زياته کړې او دې هدف ته د رسېدو لپاره يې سږکال
اټولونکې ادارې یا اېف پي اېف بيټرانیزو څه باندې ۱۴ ټرېلیونه پاکستاني روپیو په ارزښت د مالیاتو راټولول اړین ګڼلي.
د راپور یوه برخه: « د سرچینې په وینا، چارواکي به اړ وي چې د ۵۰۰ میلیارد پاکستاني روپیو اضافي مالیات وضع کړي، ترڅو ټاکلي هدف ته ورسېږي او دغه اقدام به پر ۱.۳ ټرېلیون اضافي مالیاتو سربېره وي چې په روان کال کې د خلکو پر معاشاونو وضع شوې دي.»
د راپور پر بنسټ، د بودیجوي کسر کمولو لپاره د پاکستان حکومت ځان ته د ناخالصو توليداتو د ټولیز ارزښت ۱۱ سلنې په اندازه اضافي عوایدو راټولو هدف اېښی چې په راتلونکې جولای میاشت کې په دې اړه د جوړې شوې تګلارې له پيل وړاندې به يې د ارزونې په اړه د پيسو نړيوال وجهي صندوق پلاوی هم پاکستان ته سفر وکړي.
د اېکسپرېس ټرېبيون په راپور ويل شوي، د پاکستان حکومت په بودیجې کې د کسر له امله د رامنځته شویو فشارونو کمولو لپاره وار له مخې پر بانکي او خصوصي سکټور محدوديتونه لګولي او هم یې د نفتو بیې د مالیاتو زیاتېدو له امله ۱۸ سلنه لوړې کړې دي.
د راپور یوه برخه: « له وړاندې پر خلکو د زیات فشار سربېره هم حکومت د ۸۳۰ مېلیارد روپیو له بودیجوي کسر سره مخ دی او دا د دې ښکارندويي کوي چې خلک د کمزوري اقتصاد له امله مالیات نه شي ورکولی. دغه راز حکومت د نفتو قېمتونه د مالیاتو زیاتېدو له امله ۱۸ سلنه لوړ کړي چې د پټې بودیجې لپاره د مالیاتو د منبع په توګه کارول کېږي.»
ورځپاڼې دغه راز په خپله راپور کې دا هم ويلي، د پاکستان دولتي مالي سکټور او د دې هېواد د سوداګرۍ او صنعت خونې ترمنځ په ګډه ناسته کې په یو شمېر سوداګریزو توکو د مالیاتو کمولو وړاندیزونه شوي چې په اړه یې لا پرېکړه نه ده شوې او ښايي د پراخو مالیاتو په وضع کولو سره د دې هېواد خصوصي سکټور او بهرني سوداګر له جدي ننګونو سره مخ شي.
پاکستان د عوایدو کمښت له امله څو ځله د پيسو له نړيوال وجهي صندوق(آی.اېم.اېف) پور اخیستی، خو اوس څرګنده نه ده چې روان کال به دغه صندوق پاکستان ته د پور ورکولو لپاره د اسلام اباد غوښتنې ومني او که نه.
د سیاسي چارو شنونکی عزیز معارج وايي: « دوی له شرق او غرب او دغه راز چین سره په اړیکو کې توازن نه درلود، دوی له چین او روس سره یو ډول او لوېديځ نړۍ سره بل ډول اړیکې لرلې. د پاکستان د چل، دوکې او درواغو سیاستونه د دې سبب شول چې د یوه اقتصادي سیسټم او بنسټ جوړېدو پر ځای، د سیاست او سیاسي لوبو په بدل کې کمېشن اخیستلو ته مخه کړه. دا غلط سیاستونه باعث شول چې بهرنۍ مرستې پرې ودرېږي، کورنی وضعیت یې خراب شو او اقتصادي ستونزو سره مخامخ شول. که د دوی د دغو ستونزو مخه ونه نیسي او ترڅنګ یې که هند هم پرې نظامي برید وکړي او وضعیت همداسې روان وي، پاکستان به له زوال سره مخ او په بشپړه توګه د نړۍ له نقشې پاک شي.»
ټاکل شوې د پاکستان ماليې وزیر محمد اورنګزیب په داسې حال کې د جولای پر دویمه یا درېیمه نېټه د دې هېواد پارلمان ته د روان کال د مالي بودیجې طرحه وړاندې کړي چې هېواد یې د انفلاسیون لوړه کچه او پیکه اقتصادي وده تجربه کوي.
