د ایران ولسمشر د پاکستان لومړي وزیر په بلنه د شنبې په ورځ اسلام اباد ته په دوه ورځني سفر تللی.
له تهران څخه تر روانېدو وړاندې مسعود پزشکیان رسنیو ته ویلي چې له اسراییلو سره د ۱۲ ورځنۍ جګړې په بهیر کې پاکستان یو له هغو هېوادونو و چې د ایران ملاتړی دريځ يې درلود.
د ایرانا خبري آژانس د راپور له مخې، ایرانی لوری به له پاکستان سره په امنیتي او اقتصادي مسایلو او د انرژۍ د توليد په تړاو خبرې وکړي.
د ایرانا په راپور کې راغلي: « د دې رسمي سفر پرمهال به د تهران او اسلام اباد په دوه اړخیزو اړیکو خبرې وشي او دغه راز به پر اقتصادي، امنیتي او د انرژۍ توليدولو اړوند مسایل تر بحث لاندې ونیول شي. همدارنګه، دواړه لوري به د دوو ګاونډیو هېوادونو په توګه له یو بل سره ډېپلوماټیکې اړېکې لا ټینګې او په اړه به یې بحثونه وکړي.»
پاکستان د ايران او اسرایيلو ترمنځ د وروستۍ ۱۲ ورځنۍ جګړې پرمهال د تهران په ننګه په تل ابيب سختې نیوکې وکړې.
د ایران ولسمشر د دې ملاتړ ستاینې ترڅنګ ویلي، دواړه هېوادونه هڅه کوي له یو بل سره کلنۍ راکړه ورکړه ۱۰ میلیارد ډالرو ته لوړه کړي.
خو د پاکستان سوداګرۍ وزیر بیا د نوموړي د شمېر برعکس په راتلونکي کې د اسلام اباد او تهران ترمنځ ۸ میليارد ډالرو ته د سوداګرۍ لوړولو خبره کوي.
د پاکستان سوداګرۍ وزیر جام کمال وايي: « موږ دواړو لورو ژمنه وکړه چې د تهران او اسلاماباد تر منځ به سوداګریزې چارې ګړندۍ او راکړه ورکړه به په کلني ډول له ۵ میلیارد ډالرو څخه ۸ میلیارد ډالرو ته پورته کړو.»
دا د ولسمشر په توګه پاکستان ته د مسعود پزشکیان لومړنی رسمي سفر دی. د ایران بهرنیو چارو وزارت یوه لوړ پوړي چارواکي محمد رضا بهرامي د دې سفر لومړیتوبونه امنیت او بیا اقتصاد بللي دي.
د پاکستان بهرنیو چارو وزارت ویاند هم په خپل اوونیز خبري کنفرانس کې د ايران جګ پوړي پلاوي سفر ته اشاره کړې او ایران يې د پاکستان نږدې ملګری او ګاونډی ورور ياد کړی دی.
د پاکستان بهرنیو چارو وزارت ویاند شفقت علي خان ویلي: « ایران زموږ نږدې ملګری، ښه ګاونډی او زموږ ورور هېواد دی. موږ د کړکېچونو کمولو او د ستونزو لپاره د ډېپلوماټیکو حل لارو په برخه کې د مثبت رول لوبولو ته ژمن یو. موږ چمتو یو چې دا رول ولوبوو او دې رول ته به ادامه ورکوو.»
دا سفر په داسې وخت کې کېږي چې د یو شمېر لوېدیځو رسنیو د راپورونو له مخې، پاکستان د متحده ایالاتو او ایران ترمنځ د نامستقیمې ښکېلتیا په لړ کې د اسانچاري په توګه یو آرام خو مخ په زیاتېدونکی رول لوبوي او له همدې امله د اسلام اباد او تهران اړیکې په وروستیو میاشتو کې نږدې شوې دي.
د نړیوالو چارو شنونکی واحد فقیري وايي: « د پاکستان او ایران اړیکې له اول سره هم ښې وې او اوس هم په ښه حالت کې دي. د ولسمشر پزشکیان د سفر ډېر تمرکز پر اقتصادي مسایلو دی او هڅه کوي چې د دواړو هېوادونو ترمنځ اقتصادي راکړه ورکړه ډېره کړي.»
ایران او پاکستان د افغانستان دوه ګاونډي هېوادونه دي چې له کلونو راهیسې د افغانستان په ګڼو سیاسي، امنیتي او اقتصادي مسایلو کې ښکېل پاتې شوي.
د چارو یو شمېر شنونکي بیا له افغانستان سره د ایران او پاکستان اړيکې یو ډول بولي او وایي، دغو دوو هېوادونو د تاریخ په اوږد کې د افغانستان په اړه یو شان سیاست درلود.
د سیاسي شنونکی شهسوار سنګروال وايي: « باید هېڅکله پر دغو دوو ګاونډیو باور ونه شي، په ځانګړې توګه اوس چې په دې وروستیو کې دوی له افغان کډوالو سره د ټولو نړیوالو اصولو خلاف ناړه چلن پيل کړی دی.»
د پاکستان لومړي وزير شهباز شریف هم سږ کال د غبرګولې په میاشت کې ایران ته سفر وکړ.
تهران ته د شریف د سفر په بهیر کې نوموړي د دې هېواد له ولسمشر او د ایران له مذهبي مشر ایت الله علي خامنه ای سره ليدلي و.
شریف تهران ته د خپل سفر پرمهال ویلي و چې پاکستان د ایران د ” اټومي انرژۍ د سوله ییزې کارونې” حق ملاتړ کوي او د دواړو هېوادونو ترمنځ د اقتصادي همکاريو د کچې لوړولو غوښتنه یې کړې وه.
