په قبايلي سيمو، خيبرپښتونخوا، بلوچستان او ټول پاکستان کې د ناامنیو زياتېدو له امله پاکستان په خپلو یو شمېر تېروتنو اعتراف ته اړ شوی او تازه يې بهرنيو چارو وزير ويلي، تېر۴ کاله يې د پوځيانو لپاره ډېر خونړي وو.
محمد اسحاق ډار د شنبې په ورځ خبري کنفرانس ته ويلي، په دې موده کې ځينې تېروتنې د دې سبب شوې چې ۴زره پاکستاني پوځيان په جګړه کې ووژل شي او ۲۰زره نور ټپيان شي.
نوموړي دا نه ده روښانه کړې چې تېروتنې يې څه دي، خو وايي د دې تېروتنو ټوله قرباني پاکستاني پوځيانو ورکړې ده.
د پاکستان بهرنیو چارو وزیر محمد اسحاقډار زیاته کړې: « موږ د ترهګرۍ پر وړاندې عملیات پیل کړل او ومو ځپله. که تاسې د پاکستان تېرو کلونو ته پام وکړئ، نو وبه ګورئ چې هلته په دې برخه کې جدي ګامونه نه دي پورته شوي، خو موږ دغه کار وکړ. موږ خپله هم ځینې تېروتنې کړې دي چې له امله یې موږ اوس قرباني ورکوو. تاسې خبر یاست چې له ۲۰۲۱ کال څخه تر ۲۰۲۵کال پورې څلور زره پاکستاني سرتېري د ترهګرۍ قرباني شوي. موږ په دې برخه کې له۲۰زرو زیات ټپیان هم لرو.»
شنونکي د پاکستان تېروتنه د ترهګرۍ پر تمويل او روزنې د دې هېواد تکيه ګڼي او زياتوي، اوس د دې تګلارو پايلې معکوسې شوې دي او پاکستان يې د پوځي تلفاتو په زياتېدو سره خوند څکي.
د سیاسي چارو شنونکي محمداسماعیل ځدراڼ وايي: « دا د پاکستان غلطه پالیسي وه، دوی خپله جوړه کړې وه او اوس یې ښکار شول. پاکستان اوس په کور دننه له زیاتو ستونزو سره مخ دی.»
ځينې نور شنونکي وايي، پر ملکي او پوځي چارواکو د عامو پاکستانيانو باور کم شوی او د بېرته ترلاسه کولو لپاره چانس هم له لاسه ورکړی. دوی باوري دي چې که پاکستان د ترهګرۍ له تمويل او تجهيز لاس په سر نه شي، د دې امکان شته چې ناامني تر اسلاماباد پورې ورسېږي.
د سیاسي چارو شنونکی شهسوار سنګروال وايي: « د پاکستان پوځ د ظلمونو پر وړاندې د ټيټيپي او بلوڅانو آزادي غوښتونکي غورځنګ په څېر د ټولو تحرکات اساسي لامل د پاکستاني پوځیانو او ملکي حکومت ناسمې پالیسۍ دي. که پاکستان غواړي دغو ناامنیو ته د پای ټکی کېږدي، ښه دا ده چې د خپلو ناراضي خلکو غوښتنو ته غاړه کېږي.»
پاکستاني چارواکو په وار وار د یاد هېواد د ناامنیو ګوته افغانستان ته نېولي، خو باور دا دی چې د پاکستان پوځ د خپلو ګټو په خاطر ملکي وګړي په جګړې کې د سپر په توګه کاروي او د دې ترڅنګ يې له ملکي حکومت سره وخت ناوخت ناندرۍ د دې سبب شوې چې هلته د امنيتي بحران ترڅنګ سياسي او اقتصادي بحران نور هم ژور شي.
