په داسې حال کې چې پاکستان د يوې لارې يوه کمربند په چوکاټ کې د سپيک يا د چين او پاکستان اقتصادي کوريډور تر چتر لاندې پروژې تطبيق کوي، تازه د تحريک طالبان پاکستان (ټي.ټي.پي) ډلې په يادو پروژو کې له پاکستان د ۵ سلنې ماليې غوښتنه کړې.
د يادې ډلې يوه قوماندان فیصل په یوه خپره کړې ویډیو کې ويلي، د پاکستان حکومتي چارواکي دې په يادو پروژو کې د دوی دماليه په پام کې ونيسي، که نه د يادو پروژو تطبيق ته به اجازه ور نه کړي او کار کوونکي به يې پر نښه کړي.
هغه زیاته کړې: « موږ ته دې خپله مالیه ادا کړي په هر ځای کې پنځه سلنه زموږ حساب دی، حکومت دې د تحریک طالبان پاکستان له مجاهدینو سره خبرې وکړي، زه د فیصل په نامه د تحصیل ولسوالۍ په سطحه دلته مدیر یم، نو له ما سره دې خبرې وکړي بیا دې ښه په ارامه خپل خلک رالېږي. زموږ له ټولو افسرانو دا هېله ده تر هغې دې دلته نه راځي ترڅو یې چې له موږ سره خبرې نه وي کړي، زموږ شمېرې دې واخلي او رابطه دې کوي چې کله راځي، که نه نو بیا که دلته کوم زیان ور ورسېده موږ یې هېڅ مسوول نه یو.»
کارپوهان د يوې لارې يوه کمربند په اړوند پروژو کې چې د پاکستان تر کنټرول لاندې حدودو کې پلي کېږي، د تحريک طالبان پاکستان له لوري د ماليې غوښتنه د يادې ډلې قوت يادوي.
دوی په دې باور دي که ياده ډله له پاکستان باج ګيرۍ ته دوام ورکړي ښايي په راتلونکې کې د پاکستان د بقا راتلونکی له سوال سره مخ شي.
د پوځي چارو کارپوه اختر محمد راسخ وايي: « د ټی.ټي.پي په هکله ویلی شم له دوی به په پاکستان کې یو لوی قوت جوړېږي او د نظام د ړنګولو توانايي به دوی کې پيدا کېږي، ځکه چې خپله د پنجاب استخباراتو او جنرالانو کړنې د پښتنو او بلوڅانو پر وړاندې د جنګ بستر ته لار هواروي، دوی د بلوڅانو عزت ته هم لاس اچولی او د پښتنو عزت او شملو ته یې هم لاس اچولی دی نو د دوی خپلې کړنې دي چې دغه زېږنده حالات چې تاسې ګورئ رامځته کړي او دا هر څه د پاکستان د استخباراتو، سیاست مدارانو او جنرالانو د کړنو له امله دي.»
خو ځینې نور دې مسلې ته د شک په سترګه ګوري او زیاتوي، چې پاکستان په لوی لاس وضعيت مهندسي کوي او غواړي چې له فرضي کرښې پورې غاړه په قبايلي سيمو کې مطرح او ملتپاله اشخاص په نښه او له منځه يې يوسي.
د پوځي چارو کارپوه احمد خان اندړ وايي: « دلته دوې خبرې دي یا دا چې خپله (ټي.تي.پي) ډېره ځواکمنه شوې ده او هڅه کوي د پاکستان حکومت په مقابل کې ځېني ګواښونه وکړي او یا د پاکستان پوځ او استخبارات له پخوانیو ستراتیژيو کار اخلي او هڅه کوي دلته ترهګري قوي وښيي او له نړیوالې ټولنې پیسې ترلاسه کړي، بلې خوا په پښتني سیمو کې بیا د دوی پوځ عملیات ترسره کړي، پښتانه وځپي او له همدې لارې خپلو موخو ته ورسېږي.»
په دې وروسیو کې پر پاکستاني ځواکونو او د دوی پر اهدافو د تحریک طالبان پاکستان ډلې بريدونه زيات شوي او په قبايلي سيمو کې يې ځينې سيمې تر کنټرول لاندې کړي دي.
خو پاکستان بيا د دې هرڅه پړه پر افغانستان ور اچولې، چې د افغانستان سرپرست حکومت دا ډول ادعاوې بې اساس ګڼلي.
