د پاکستاني طالبانو تحریک(ټي.ټي.پي) په تازه خپرو کړیو ویډیوګانو کې د خپلو جنګیالیو د لا انسجام او د پاکستان د پوځ پر مرکزونو د برېدونو زیاتوالي خبرداری ورکړی.
ټي.ټي.پي د مې میاشتې پر ۲۶ مه پر پاکستاني پوځيانو له ۱۰ زياتو داسې بریدو جزییات خپاره کړي چې د جنوبي او شمالي وزیرستان او خیبرپښتونخوا په ګڼو سیمو یې کړي دي.
ټي.ټي.پي د خیبر سیمې په تېرا دره کې د درېیو پوځي مرکزونو د نیونې ادعا هم کړې چې له نښتو وروسته يې له پوځ نيولي دي.
ټي.ټي.پي په دې اړه ویلي:« د ۲۰۲۵ زېږدیز کال د مې پر ۲۶مه د مجاهدینو له لوري د ۱۳ ترسره شویو برېدونو په پایله کې د ټانک، خیبر، جنوبي وزیرستان، شمالي وزیرستان او چترال ولايتونو په یو شمېر ولسوالیو کې پاکستاني پوځیانو ته درنه مرګ ژوبله اوښتې. همدارنګه په ځينو سیمو کې د هغوی پوځي مرکزونه هم نیول شوي.»
په ورته مهال پخوانی امریکايي ډېپلوماټ زلمي خلیلزاد د بلوڅ آزادي غوښتونکو(بې.اېل.اې) پر وړاندې د داعش له لوري د جګړې پیلولو خبرداري په غبرګون کې ویلي، دغه ګواښ دا ثابتوي چې پاکستان کې د داعش ډلې لپاره روزنیز کمپونه موجود دي.
خلیلزاد زیاته کړې، اوس مهال د بلوڅ آزادي غوښتونکو پر وړاندې د پاکستان پوځ او داعش مخالفت په یوه دریځ کې قرار لري.
خلیلزاد په دې اړه ویلي: « لومړی، اوسمهال د بلوچستان په غرنیو سیمو کې د داعش روزنیز کمپونه وجود لري. دویم، د مارچ په نیمايي کې د بلوڅ آزادي غوښتونکو له لوري داعش په روزنیز کمپ په برېد کې د څو بهرنیو وګړیو په ګډون ۳۰ داعش جنګيالي ووژل شول. درېیم دا چې دغه ویډیو ښيي د بلوڅ آزادي غوښتونکو او نورو بلوڅ ملتپاله ډلو پر وړاندې د تاوتریخوالي تحرکات پای ته نه دي رسېدلي او د پاکستان امنیتي ځواکونه او داعش په یو دریځ کې ځای لري.»
د دې ترڅنګ بلوڅ آزادي غوښتونکو ته منسوبو رسنیو یو شمېر هغه ویډیوګانې خپرې کړې چې په کې پاکستاني پوځيان له لوري په بلوچستان کې د عامو خلکو ویجاړ شوي کورونه ښکاري.
د سیاسي چارو کارپوهان وايي، په بلوچستان کې د بلوڅانو مدني تحرکاتو پر وړاندې د پاکستاني ځواکونو له خوا د تاوتریخوالي ډک غبرګون د بشري حقونو ښکاره نقض دی.
دوی له نړیوالې ټولنې غواړي چې د پاکستان حکومت پر وړاندې د بلوڅو او نورو قومونو ملاتړ هېر نه کړي.
د پوځي چارو شنونکی صادق شینواری وايي: « د پاکستان د بلوڅانو مبارزې اصلي هدف د خپلو حقونو ترلاسه کول دي. د بلوڅ مدني فعالانو د مبارزې مخنیوی د بشري حقونو، ډیموکراسۍ او آزادۍ د قوانینو خلاف عمل بلل کېږي. باید پر نړیواله کچه د پاکستان د بلوڅ مدني فعالانو ملاتړ وشي او نړیواله ټولنه په دې برخه کې مداخله وکړي.»
د پاکستاني طالبانو تحریک له لوري د پوځي تحرکاتو زیاتوالي خبرداری داسې مهال ورکړل شوی چې څو ورځې وړاندې د پاکستاني پوځيانو له لوري په هوايي برېدونو کې د شمالي وزیرستان یو شمېر ملکي وګړي چې ماشومان هم په کې شامل وو، ژوند له لاسه ورکړی و.
