د پاکستان لومړي وزیر قطر ته سفر کړی

شریف وايي،قطر او پاکستان ښیې اړیکې لري،خو دا ځل به هڅه وکړي، دغه اړیکې پر ستراتژیکو اړیکو بدلې کړي.

شریف زیاته کړې:« د شیخ تمیم بن حماد الثاني په غوښتنه نن قطر ته روان شوم. دغه لېدنه به زموږ د دواړو هېوادونو ترمنځ د ورورولۍ او ملګرتیا د بیا تازه کیدو او نوي کیدو لامل شي. موږ غواړو،چې زموږ تاریخي دوه اړخیزې اړیکې په لا زیاتو سټراټيژیکو  اړیکو بدلې کړو.»

د سیاسي چارو شنونکي بیا وايي، په کابل کې د الظواهري له وژل کیدو وروسته نړۍ ډاډه شوې،چې د ترهګرو ډلو  ځایونه او روزنیز کمپونه پاکستان کې دي او الظواهري هم د دغه هېواد داستخباراتو په وسیله کابل ته لیږدول شوی وه،چې د امریکا له لوري ووژل شو.

دوی وايي،شهباز شریف د قطري چارواکو په بلنه دوحې ته تللی  دی،چې هلته د نړۍ له استازو سره له نږدې خبرې وکړي او د ترهګرۍ د روزنې ادعاوو په تړاو وضاحت ورکړي.

د سیاسي چارو شنونکی توریالی ځاځی وايي:« دا چې د پاکستان لومړي وزیر شهباز شریف قطر ته سفر کړی دی، په اصل کې دی قطر ته غوښتل شوی. د الظواهري له وژل کیدو وروسته نړیوال باوري شول،چې ټولې تروریستي ډلې او ټپلې پاکستان کې روزل شوي دي او الظواهري هم له پاکستانه  افغانستان ته انتقال شوی وه،چې د امریکا له لوري ووژل شو او شبهاز شریف به د نړیوالو استازو ته ځواب  ورکوي.»

ځینې بیا وايي،اوس قطر او پاکستان دواړو د افغانستان له حکومت مخ اړولی دی،د نجونو د تعلیم او کار پر برخې قطر له افغانستان ګیله لري او همداراز پر ټي ټي پي د لازم فشار د نه راوړلو او سولې ته د هغوی نه هڅولو مسلې له کابله د اسلام اباد ناراضه او خفه کړی دی.

د سیاسي چارو شنونکی طارق فرهادي وايي:« قطر او پاکستان دواړو د کابل له حکومت سره ستونزې پیدا کړي دي،د ښځو حقوق او بشري حقونه نه مراعت کول قطر ناراحته کړی دی او پاکستان بیا په دې ترې خفه دی،چې د افغانستان هغه ډول،چې لازمه په تحریک طالبان پاکستان فشار نه راوړي،چې اسلامي اباد سره سوله وکړي.»

انګیرنې دادي،چې د جمهوریت له سقوط وروسته پاکستان له افغانستان سره د خپل مخالفت ستراتیژي بدله کړې او هڅې یې پیل کړي،چې کابل له نړۍ لرې وساتي او افغانستان په نړیواله سیاسي او اقتصادي انزوا کې پاتې شي.