د هند لومړي وزیر نریندرا مودي د پاکستان په تړاو په خپلو وروستیو څرګندونو کې ویلي، پاکستان د ترهګرۍ ملاتړ هېواد او اسلام اباد د ناورین مرکز دی.
مودي دغه راز ویلي، پاکستان نړۍ ته ترهګري صادروي او له دې هېواد سره تړلو ترهګریزو فعالیتونو نه یوازې هند بلکې ټولې نړۍ ته زیان رسولی.
د هند لومړي وزیر له پاکستاني چارواکو غوښتي چې نور د ترهګرۍ له ملاتړه لاس واخلي او سوله دې انتخاب کړي.
مودي زیاته کړې: « پاکستان د ناورین مرکز او د ترهګرۍ ملاتړی هېواد دی. له پاکستان سره تړلو ترهګریزو فعالیتونو یوازې هند نه، بلکې ټولې نړۍ ته زیان رسولی. دغه هېواد د ترهګرۍ صادروونکی دی. د نړۍ په هر ترهګریز برید کې د پاکستان نښې لیدل کېږي.»
مودي ویلي، په پاکستان کې د اسامه بن لادن وژنه یې ښه بېلګه ده چې دغه هېواد له ترهګرو ډلو ملاتړ کوي.
اسامه بن لادن د سپټمبر یولسمې بریدونه تنظیم کړي و، خو په پاکستان کې اوسېده او هملته ووژل شو.
د مودي په خبره، اوس ټوله نړۍ په دې پوهیږي چې د ترهګرو ځالې او مرکزونه په پاکستان کې دي او دغه هېواد یې ملاتړ کوي.
دغه راز مودي خبرداری ورکوي، ترڅو پاکستان چې د نړۍ پرمخ موجود وي، د سیمې او نړۍ هېوادونه به له ترهګرۍ آرام ژوند ونه لري.
د سیاسي چارو شنونکي هم د هندي چارواکو د خبرو پخلی کوي او وايي، پاکستان په سیمه کې د ناخوالو او ترهګریزو پېښو رامنځته کولو مرکز دی.
د سیاسي چارو شنونکی توریالی ځاځی وايي: « ترڅو پاکستان په دې سیمه او نړۍ کې موجود وي، نړۍ به له ترهګرو ډلو آرام ژوند ونه لري. د پاکستان تجزیه د نړۍ امن او سوله ده.»
د سیاسي چارو شنونکی حکمتالله حکمت وايي: « د پاکستان حکومت له پیدایښت ترنن پورې، د پاکستان د ولس لپاره نه د زاړه استعمار او د امریکا د ګټو لپاره رول لوبولی دی. پاکستان په سیمه کې د جګړو او ستونزو رامنځته کولو او د اقتصادي بندیزونو اساسي مرکز ګرځېدلی.»
دا په داسې حال کې ده چې په پاکستان کې جګړې زور اخیستی او د دې هېواد پر امنیتي ادارو، پوځي کاروانونو او نظامي تأسیساتو بریدونه زیات شوي دي.
ترټولو تازه برید کې چې د بلوچستان په نوشکي سیمه کې د امنیتي ځواکونو پرکاروان ترسره شو، د ۹۰ تنو سرتیرو د وژل کېدو خبر ورکړل شوی دی.
د پوهنتون استاد فیض محمد ځلاند وايي: « پاکستان له بده مرغه د خپلو نیمګړو او بدرنګو پرېکړو او پالیسیو نتایج ویني. هر هغه هېواد چې د نورو هېوادونو په کرکېچ او کمزوري کولو کې خپلې ګټې ویني او په کورنیو چارو کې یې لاسوهنه کوي، د پاکستان په سرنوشت به اخته کېږي.»
څه موده وړاندې افغان لوري داسې اسناد او راپور وړاندې کړ چې داعش ډله له ډیورنډ فرضي کرښې هاخوا په خیبر پښتونخوا او بلوچستان ایالتونو کې مرکزونه لري او د پاکستان د پوځ له خوا روزنه ورکول کېږي.
