د روانې اپريل پر ۲۲ د هند تر ولکې لاندې کمېشر کې وسله والو ۲۶ هندي سیلانیانو ته د مرګ ژوبلې اوښتو او د هند لخوا له پوځي لارو له پاکستان غچ اخیستونکی درېځ له ګڼو غبرګوونو سره مخ شوی.
د ملګرو ملتونو امنیت شورا سیلانیانو ته د اوښتې مرګ ژوبلې په اړه خواشیني ښودلې او په هره بڼه ترهګري یې د نړیوالې سولې او امنیت لپاره جدي ګواښ بللی دی.
امنیت شورا زیاته کړې:« ترهګري په ټولو بڼو کې د نړیوالې سولې او امنیت لپاره له جدي ګواښونو یو دی.»
د دې سازمان د سرمنشي ویاند سټېفېن دوجاریک له نوي ډهلي او اسلام اباد غوښتي چې کړکېچونو زیاتېدو پر ځای دې د نرمښت او انعطاف له پالیسۍ کار واخلي.
هغه زیاته کړې:« موږ د هند او پاکستان پر حکومتونو غږ کوو چې له ډېر احتیاط کار واخلي، څو وضعیت نور خراب نه شي.»
په ورته مهال د پاکستان دفاع وزیر له سکای نېوز سره په یوه تازه مرکه د هند تر ولکې لاندې کشمېر کې د وروستي برید په اړه د یوې خپلواکې نړېوالې څېړنې د ترسره کولو وړانديز کړی.
خواجه اصف د هند له لوري پر پاکستان احتمالي پوځي برید ته په غبرګون کې ویلي،پاکستان په سیمه کې د تاوتریخوالو مخنیوي لپاره جګړه نه غواړي، خو په خبره يې د هر ډول ګواښ پر وړاندې بې ځوابه نه پاتې کېږي.
هغه همداراز دا تایید کړې چې پاکستان څو لسیزې د امریکا، بریتانیا او لویدیځ په ښکېلو جګړو کې د برخه اخیستلو له امله تېروتنه کړې، چې اوس مهال یې زیانونه تجربه کوي.
اصف زیاتوي:« موږ دغه ناوړه کار له شاوخوا درې لسیزو راهیسې د امریکا، بریتانيا او لویدیځ لپاره ترسره کړ.»
هند له دې برید وروسته له پاکستان سره د سیاسي، اقتصادي او ډيپلوماتیکو اړېکو پر پرېکولو سربېره پاکستان ته د اوبو ورکولو هغه تړون هم وځنډوه، چې په ۱۹۶۰ کال کې هندوس له سېند پاکستان ته د اوبو ورکولو په موخه لاسليک شوی.
پاکستان د هند دې اقداماتو په غبرګون کې د واګې بندر وتړه او هند ته د پاکستان له فضا د تېرېدونکو الوتکو پر الوتنو یې بندیز وضع کړ.
خو له دې ټولو ګواښونو سربېره نوي ډیلي ګواښ کړی چې له پاکستان به د جمو او کشمېر وروستي وسلوال برید غچ حتمي اخلي.
