اروپايي ټولنه او ملګري ملتونه غواړي د عربي ژورنالیست قضیه په شفاف ډول وڅیړل شي.
ملګري ملتونه له ترکيې حکومت او سعودي عربستان غواړي چې په دې قضیه کې هر ډول مالومات ورسره وي باید له هغوی سره یې شریک کړي.
په ورته وخت کې د امریکا د بهرنیو چارو وزیر مایک پمپیو سعودي ته تللی چې د دغه هیواد له چارواکو سره په دې تړاو خبرې وکړي.
د اروپايي ټولنې د بهرنۍ پالیسۍ مشره فیدريکا موګیرني وايي د اورپايي ټولنې ټول ۲۸ غړي د عربي ژورنالست د قضیې پایلو ته په تمه دي.
فیدریکا موګیرني وايي اروپايي ټولنه چمتو ده چې په دې برخه کې له ترکي چارواکو سره همکاري وکړي.
د اورپايي ټولنې د بهرنۍ پالیسۍ مشرې فیدریکا موګیرني داسې وویل (( موږ ټول په دې حقیقت سره راټول یو چې دغه قضیه په شفاف ډول وڅیړل شي. موږ تمه لرو چې سعودي او ترکي چارواکي په دې تړاو څرګند دریځونه اعلان کړي. اروپايي ټولنه به د دغو څیړنو ملاتړ وکړي.))
موګیرني زیاته کړه چې په دې برخه کې د خپلو متحدو هیوادونو لکه امریکا هڅې هم د ستایلو وړ دي.
اخوا ملګرو ملتونو له ترکیې او سعودي غوښتي چې په دې قضیه کې څومره مالومات لري له دوی سره دې شریک کړي.
د ملګرو ملتونو کمیشنر روپيرټ کولوېل داسې ویلي (( د جمال خاشقجي د لادرکه کیدو نن دوه اونۍ بشپړې شوې، او نن د ملګرومتلونو کمیشنري له سعودي عربستان او ترکيې غواړي چې د قضیې په تړاو یې هرڅه موندلي وي له هغوی سره دې شریک کړي. او که امکان لري د هغه د وژل کیدو لپاره دې ځانګړې محکمه جوړه کړي.))
اخوا د سعوي پاچا سلمان تیره ورځ کورنیو څیړنو ته اجازه هم ورکړې ده.
بل لور ته ترکي چارواکو چې ددې قضیه لپاره یې په قونسلګرۍ کې ۹ ساعته پلټنه وکړه وايي شواهد ښيي چې خاشقجي د ودانۍ دننه وژل شوی او جسد یې بیا بل ځای ته لیږدول شوی دی.
اخوا د امریکا د بهرنیو چارو وزیر مایک پمپیو د همدې قضیې په موخه سعودي عربستان ته تللی او د دغه هیواد له چارواکو سره یې کتلي خو د خپل سفر جزییات یې لا ندي وړاندې کړي.
