د نړۍ له ۷۰ زیات رهبران فرانسه کې د لومړۍ نړیوالې جګړې د پای ته رسېدو سلم کالیزه نمانځي
د فرانسې پلازمینه، پاریس ښار نن د لسګونو هیوادونو د مشرانو کوربه دی.
د نړۍ ګڼ شمیر هیوادونو مشران پاریس ته تللي چې د نړیوالې لومړۍ جګړې په ۱۰۰مې یادغونډه کې ګډون وکړي.
په دې لیدنه کې ټرمپ د خپلو تیرو څرګندونو خلاف د پیاوړې اروپا هیله وښوده او دا یې د امریکا غوښتنه وګڼله.
د فرانسې ولسمشر ایمنیول ماکرون او د جرمني لومړۍ وزیره انګیلا میرکل هغې سیمې ته تللي چې د لومړۍ نړیوالې جګړې سختې شېبې پرې تیرې شوې دي.
د غونډې په پېل کې د امریکا ولسمشر ډونالډ ټرمپ له خپل فرانسوي سیال ایمنیول ماکرون سره په ایلسي ماڼۍ کې ولیدل.
ایمنیول ماکرون ټینګار وکړ چې له امریکا سره هر راز همکاري او ملګرتیا د دوی هیله ده.
د فرانسې ولسمشر ایمنیول ماکرون وویل، ((تر هرڅه لومړی، لکه څنګه چې تاسې وینئ، موږ د خپل ولس او د دواړو هیوادونو ترمنځ د نظامي او ملکي اړیکو په خاطر دلته راټول شوي یو، د یوه خپلواک حاکمیت په چوکاټ کې دا دواړه هیوادونه له اوږدې مودې راهیسې متحد ملګري پاتې شوي دي.))
ماکرون وايي اروپا د ناټو پیاوړی غړی دی او په دې نړیوال سازمان کې دی د خپلو نظامي ظرفیتونو د لوړولو لا زیاته هڅه کوي.
بل لور ته د امریکا ولسمشر ډونالډ ټرمپ وايي، له اروپا سره ملګرتیا غواړي، او پیاوړې اروپا د دوی غوښتنه هم ده.
ټرمپ وویل، ((زه ستاسې څرګندونو ته درناوی لرم، تاسې پوهیږئ چې زما غوښتنه څه ده، زه هم غواړم چې پیاوړې اروپا ولرو. دا موږ ته مهمه ده چې اروپا پیاوړې شي، او دا هغه څه دي چې موږ دواړه هیوادونه دا غوښتنه لرو.))
هلته په پاریس کې د نړۍ ګڼ نور مشران هم راټول شوي او چې د لومړۍ نړیوالې جګړې په سلمه یاد غونډه کې ګډون وکړي. دغو مشرانو له یو بل سره د غونډې په څنډه کې ځانګړې ناستې هم وکړې.
