د بلوڅ آزادي غوښتونکي غورځنګ (بي.اېل.اې) له لوري په بلوچستان کې د جعفر اېکسپرېس اورګاډي له برمته کولو وروسته، د پاکستان لومړي وزیر شهباز شریف د بلوچستان مرکز کویټې ته تللی او هلته يي له امنیتې چارواکو سره ناسته کړې.
شریف په دې ناسته کې په توندو الفاظو د امنيتي چارواکو په هڅو نيوکې کړې او په پاکستان کې يې اوسنی امنيتي وضعيت د اندېښنې وړ بللی.
شریف زیاته کړې، د پاکستان امنيتي ځواکونو ترڅنګ عامو پاکستانيان هم د ترهګرۍ له منځه وړلو په موخه قرباني ورکړه او د پوښتنې په توګه يې ويلي چې دغه پديده بيا څنګه راپيدا شوه؟
شریف په دې اړه ویلي:« د ترهګرۍ له منځه وړلو لپاره ملت ۸۰ زره کسان قرباني کړل. زموږ امنیتي ځواکونو دا بلا له منځه یوړه؛ نو ولې يې بیا سر راپورته کړ؟»
شریف پرته له دې چې د کوم هېواد نوم ياد کړي خو هند ته په اشارې ويلي، ختيځ دوښمن د پاکستان پر وړاندې منفي تبليغات کوي.
بله خوا، هندي چارواکو د شریف دې خبرو ته په غبرګون کې ویلي، هېڅوک دې د خپلو ناکامیو پړه پر نورو نه اچوي.
د هند بهرنیو چارو وزارت ویاند رندیرجیسوال ویلي:« پاکستان دې د خپلو ناکامیو پړه په نورو نه ور اچوي. نړۍ پوهېږي چې د ترهګرۍ مرکز کوم هېواد دی. پاکستان باید خپل ګرېوان کې سرښکته کړي.»
د سیاسي چارو شنونکي بیا وايي، پاکستان له اوږدې مودې راهیسې د خپلو شخصي ګټو خوندي کولو او د سيمې نا آرامه کولو لپاره ترهګرې ډلې روزلې دي او په خبره يې اوس د خپلو همدې کړنو پايله ګوري.
د سیاسی چارو شنونکی اخترمحمد راسخ وايي:« د پاکستان سیاسي، اقتصادي او نظامي وضعیت په ویجاړېدو دی او ورځ تر بلې د ورانۍ یا تباهۍ پر لور روان دی. د بلوڅ آزادي غوښتونکي غورځنګ یوالی او مبارزات بریا ته رسېږي، د ټي.ټي.پي مبارزه د پاکستان لمنې ته اور اچوي، پښتانه هم خپله آزادي او حقوق له پنجابیانو غواړي. دا لوبه چې په تېره نیمه پېړۍ کې د نورو د نا امنۍ لپاره د پنجاب استخباراتو او جنرالانو پيل کړې وه، اوس دوی له همدې لوبې اور اخیستی.»
د سیاسي چارو شنونکی توریالی ځاځی وايي: « اوس نړۍ ته هم ثابته شوه چې پاکستان د تروریستي ډلو ځاله ده. په بلوچستان کې پر اورګاډي شوی برید هغه عمدي او قصدي لوبې دي چې د پاکستان پوځ او استخباراتي ادارو پيل کړې دي. دوی غواړي په دې سره له نړۍ د ترهګرو ځپلو په موخه پیسې واخلي.»
د تېرې سه شنبې په ورځ بلوڅ آزادي غوښتونکو د بلوچستان د بولان درې اړوند په مشکاف تونل کې د جعفر اېکسپرېس اورګاډی برته کړ چې په کې يې سلګونه پاکستاني پوځیان ژوندي ونیول او له ځان سره يي نامالوم ځای ته يووړل.
