د لیبیا پخواني واکمن معمر القذافي زوی سیف الاسلام قذافي د ناپېژانده کسانو له لوري په ډزو وژل شوی. رسنیو د سیف السلام قذافي د وکیل خالد الزایدي په حواله د نوموړي د وژلکېدو خبر تایید کړی دی.
د سیفالاسلام قذافي نږدې سیاسي ملګرو د اعلامیې په خپرولو سره ویلي، مخ پټو وسلهوالو د هغه پر کور برید کړی او په پایله کې یې سیف الاسلام قذافي وژل شوی.
د سیفالاسلام قذافي ملګرو په اعلامیه کې راغلي: « څلورو نقابلرونکو کسانو د هغه پر کور یرغل وکړ او هغه یې په بزدلانه او خاينانه توګه ترور کړی دی. قذافي له بریدګرو سره نښته کړې وه او بریدګرو د کور امنیتي کامرې بندې کړې وې، ترڅو د خپلو ناوړه جرمونو نښې پټې کړي.»
په ورته مهال، د لیبیا لویې څارنوالۍ ویلي، د قذافي د وژلکېدو په اړه یې څېړنې پيل کړې دي. سیفالاسلام قذافي د ۱۹۷۲ کال په جون کې په طرابلس ښار کې زېږېدلی. هغه د لیبیا د اوږدمهاله واکمن معمر القذافي دویم زوی و. نوموړي لوړې زده کړې په لوېدیځ کې کړې او ښه ویناوال و. قذافي د خپل پلار د حکومت لپاره د پرمختګپال څېره وړاندې کوله. سیف الاسلام قذافي د ۲۰۰۰ زېږدیز کال په پيل کې له لوېدیځ سره د لیبیا د اړیکو رغولو په هڅو کې مهم رول ولوباوه.
د سیاسي چارو شنونکی عزیز معارج وايي: « کله چې غربي ټولنه یو کس له منځه وړي، د هغه فکر، لار او مکتب هم له هغې ټولنې څخه پاکوي. دوی معمر القذافي له منځه یوړ، په لیبیا کې یې تغییرات راوستل، اوس که د هغه زامن او کورنۍ هم سر پورته کوي او ملت ورپسې درېږي، دوی ته د منلو وړ نه ده. د قذافي د زوی وژنه هم استخباراتي لوبه ده. نوموړی یو کادر او ښه سیاسي شخصیت و او وژنه یې د لیبیا لپاره لویه ضایعه ده.»
د معمر القذافي د واکمنۍ پر مهال د هغه ځینې نور زامن هم په هوایي بریدونو او مخامخ جګړو کې و وژل شول، خو سیف الاسلام قذافي یې تر ټولو مشهور زوی و چې تر نورو یې ډېر عمر وکړ.
د یادولو وړ ده چې د معمر القذافي نور زامن هغه مهال د ناټو په بریدونو کې وژل شوي وو.
د پوځي چارو شنونکی اسدالله ندیم وايي: « د معمرالقذافي حکومت له پایته رسېدو وروسته د لیبیا وضعیت بې ثباته او څو ټوټې دی. لیبیا نا امنه ده او خلک یې په ډلو وېشل شوي او په ملوک الطوایفي بڼه اداره کېږي. دغو ډلو ته تر ډېره خپلې ګټې مهمې دي او ملي ګټې ورته لومړیتوب نه لري.»
د لیبیا پخوانی واکمن معمر القذافي په ۲۰۱۱ کال د ناټو په همکارۍ د خپل هېواد د ملکي پاڅون په پايله ووژل شو. قذافي د لیبیا یو نوموتی رهبر و او ډېر ځله یې د امریکا په ګډون پر لوېدیځ توندې نیوکې کولې.
