د یخې هوا له امله سوریه کې د بې ځایه شویو کورنیو ۲۹ ماشومان مړه شوي دي.
د ملګروملتونو کډوالو اداره د سوریې له ډیموکرات ملیشو غواړي چې د دیرالزور سیمې شمال لویدیځ ته ترانزیت لار ورکړي چې مرستې ورسوي.
د دیر الزور شمالي برخه کې پرته سیمه حاجېن کې اوس هم د حکومت او داعش وسله والو ترمنځ سخته جګړه دوام لري.
د ملګروملتونو د کډوالو اداره وايي، د سوریې د ډيموکراتو ملیشو چې په سیمه کې واکمن دي غواړي زمینه ورته برابره کړي چې بې ځایه شویو ته مرستې ولیږدوي.
د ملګروملتونو د کډوالو ادارې ویاند، اندرېج مهیکس وویل، ((د بشر حقونو فعالینو څو ځلې له هغو ډلو چې په سیمه کې واکمن دي، غوښتلي چې یو ټرانزیټ لار ورکړي ترڅو ملګري ملتونه الهول کمپ ته خپلې مرستې ولیږدوي. هغې کمپ ته باید مرسته ورسیږي. دوه اونۍ وشوې خو تر اوسه زمینه نه ده برابره شوې.))
د ملګروملتونو دغه چارواکي وايي، د ژمي موسم او یخه هوا ددې لامل شوې چې له کابو دوه میاشتو راهیسې ۲۹ ماشومان مړه دي.
اندرېج زیاته کړه، (( له تیر ډیسمبر میاشتې راهیسې تر اوسه ۲۹ ماشومان مړه دي، د بې ځایه شویو کورنیو دا ماشومان د بېلابیلو ناروغیو له امله مړه شوي دي. هغو سیمو ته روغتیايي مواد هم نه رسیږي.))
بل لور ته د ملګروملتونو د روغتیا سازمان وايي په دې کمپونو کې ودانۍ نشته او خلک په ازاده فضا کې د ژمي ورځې شپې سبا کوي.
داعش ډله اوس هم د سوریې په شمالي برخو کې فعاله ده.
اخوا د سوریې د کردانو ډیموکرات ملیشې له هغوی سره په جګړه اخته دي او ددغې سختې جګړې له امله اوس هم زرګونه کسان خپلې سیمې او کورونو پریښودو ته اړ کیږي.
