د غزې لپاره روغتیان نړیوال سازمان وايي، پر غزې د اسرائیلي ځواکونو د یوې اوونۍ بریدونو له سلګونو کسانو وژل کېدو سربېره زرګونه نور ټپیان او بې کوره کړي.
د یاد سازمان مشر ټیډروس ادانوم د غزې سویل کې د اسرائیلو له خوا له اوربند وروسته د بریدونو بیا پیل د تېرو وحشتونو تکرار بللی او په سمدستي اوربند یې ټینګار کړی دی.
هغه زیاته کړې:« له لنډمهالي اوربند وروسته اسرائیلي پوځیانو د غزې پر اوسېدونکو بیا خونړي بریدونه پیل کړي چې بمبار شویو سیمو کې انساني ناورین رامنځته شوی. موږ په غزې کې د بشر دوستانه بېړني اوربند غوښتنه کوو او د دې ناورین دوام ته اندېښمن یوو.»
په ورته وخت کې د قطر لومړي وزیر محمد بن عبدالرحمن ال ثاني په دوحه کې خلیج همکاریو ۴۴مې ناستې ته په وینا کې ویلي، دا ناسته په داسې وخت کې ترسرکوو چې سیمه موبشري جنایت سره مخ ده او خلیج هېوادونه باید د دې ناورین پر وړاندې ودریږي.
هغه زیاته کړې:« د خلیج هېوادونو دا ناسته داسې وخت کې ترسره کېږي چې سیمه مو د سترو ننګونو شاهده ده او د بشر دوستانه همکاریو لپاره د ناستې ګډون کوونکي هېوادونه باید خپل رول ادا کړي.»
پر غزې تړانګه د اسرائیلي ځواکونو بریدونو ته اسلامي امارت غبرګون ښودل او د نړۍ د نورو هېوادونو سربېره یې پر اسلامي هېوادونو غږ کړی چې په غزه کې د ټولوژنې مخنیوی وکړي.
خو د نړیوالوغبرګونونو سره سره د اسرائیلو لومړی وزیر بینیامین نتنیاهو په خپل دریځ ولاړ دی او تازه یې ویلي تر هغې چې اسرائیلو ته له غزې ګواښونه نه وي ختم شوي جنګ نه دروي.
نتنیاهو زیاتوي:« د حماس پر وړاندې بریدونه به دوام وکړي ، د حماس ډلې له خوا ګواښ پای ته رسوو او د غزې اوسېدونکو ته زموږ د پوځ له خوا په نقشو کې هغه لارې ښودل کېږي چې څنګه وکولی شي خوندي سیمو ته ځانونه ورسوي.»
د فلسطین روغتیا وزارت وايي، په خان یونس او رفح ښارونو د اسرائیلو بریدونو د یوې اوونۍ په لړ کې د ښځو او ماشومانو په ګډون له زرو زیات فلسطینیي وګړي وژل شوي، چې د اکتوبر له اوومې تر اوسه شاوخوا ۱۶۰۰۰ کسان وژل شوي او له ۴۰زره زیات ټپیان دي.
