د عامې روغتيا وزارت په همغږۍ د یوه خصوصي روغتون له لوري د صدري جراحۍ په برخه کې نړیوال کنفرانس جوړ شو او په کې د جراحۍ څانګې بهرنيو متخصصانو هم ګډون درلود.
په دې کنفرانس کې ډېر تمرکز د روغتيا سکټور پر پیاوړتيا و، خو د جراح ډاکټرانو اتحاديې ځينې ستونزې د دې سکټور پر وړاندې جدي ننګونې یادې کړې.
دا ټولنه خبرداری ورکوي چې په هېواد کې د نجونو پر تعليم او تحصيل د محدوديت دوام له امله په راتلونکي کې د ښځينه جراحانو له جدي کمښت سره د روغتيا سکټور مخ کېدونکی دی.
د جراح ډاکټرانو اتحاديې ریيس بسم الله شیوامل وايي: « باید ووایم چې یوازې موږ نه شو کولی دغه کار یوازې په نارینه ډاکټرانو ترسره کړو. زه د یوه عمر خوړلي جراح په توګه فکر کوم چې زموږ په هېواد او ټوله نړۍ کې د ښځینه جراحانو له ګډون پرته د جراحۍ عملیات ناشوني دي. زه وېره لرم چې راتلونکو څو کالو کې په دې اړه له فاجعې سره مخ نه شو؛ حاکمیت باید په دې اړه جدي پرېکړه وکړي.»
ځينې نور ډاکټران د روغتيا سکټور د ودې او پياوړتيا په موخه په دې سکټور کې د ځينو ستونزو د حل غوښتنه کوي.
د جراح ډاکټرانو اتحاديې مرستیال کوهمند وايي: « له بده مرغه موږ د روغتیا په برخه کې د هغو کسانو په توګه چې تر ټولو لوړې زده کړې لرو او دا زده کړې موږ هم د دې خلکو په پیسو کړې دي، خو ډېر پرمختګ مو نه دی کړی.»
خو عامې روغتیا وزارت بیا وايي، روغتیا سکټور په تېر کې ګڼې ستونزې درلودې او د اسلامي امارت په راتګ سره ډېری دا ستونزې حل شوې هم دي. د دې وزارت مسوولان زیاتوي، د پاتې ستونزو د حل لپاره يې هم په کابل او نورو ټولو ولايتونو کې هڅې پيل کړې د ي.
د عامې روغتیا وزارت د خصوصي سکټور د همغږۍ ریيس احمد خندان وايي: « موږ یوازې په کابل کې د خصوصي سکټور اړوند ۴۸ داسې روغتونونه لرو چې له ۵۰ تر ۱۰۰ بسترونو ظرفیت لري. دا چې دغو روغتونونو خپلو چارو ته پراختیا ورکړې، له دې ښکاري چې پر دوی د خلکو باور زیات شوی.»
بله خوا، بهرني ډاکټران هم ډاډ ورکوي چې د افغانستان روغتيا سکټور په وده کې به همکاري کوي او د دې ترڅنګ زياتوي چې افغان ډاکټرانو ته د وېزو ورکولو ستونزې د حل په صورت کې به افغان ډاکټران د روزنې لپاره بهر ته ور وبولي.
هسپانوي جراح ډاکټر دیاګو ګونزالیز ریواس وايي: « موږ له افغان ډاکټرانو سره هر ډول مرستې ته چمتو یو.که چېرې د ویزو ستونزه حل شي، زه به افغان ډاکټران هسپانيې ته دعوت کړم او هلته به عملي زدهکړې ورکړو.»
د عامې روغتيا وزارت د معلوماتو له مخې، د روغتيا سکټور پياوړتيا په موخه له ځينو ادارو سره هوکړې هم شوې او په دې لړ کې له برېښنا شرکت سره موافقې ته رسېدلي چې روغتونونو ته يو کيلواټ برېښنا د ۱۲ افغانيو په ځای په ۶ افغانۍ ورکړي. د يادو معلوماتو له مخې، په کم لګښت د ناروغانو ښې درملنې په موخه پر خصوصي روغتونو ماليه هم کمه شوې.
