خیبرپښتونخوا په ۲۰۲۵ز کال کې د پاکستاني پوځ او تحريک طالبان پاکستان يا ټي ټي پي ترمنځ د بې مخينې جګړو شاهده وه.
په خیبرپښتونخوا کې د امنيتي پېښو پر ضد د مبارزې یوې ادارې د ۲۰۲۵ زږدېز کال د امنیتي پیښو په اړه یو راپور خپور کړې دی.
په راپور کې ویل شوي، چې د پاکستاني پوځ پر امنيتي پوستو ، مرکزونو او پرسونل څه باندې ۱۵۰۰هدفي بريدونه شوي چې د تېر کال په پرتله شاوخوا ۵۰ سلنه لوړوالی ښيي.
په راپور په شویو حملو کې د عسکرو، عامو خلکو مرګ ژوبلې ته هم اشاره شوی ده.
په خیبرپښتونخوا کې د امنيتي پېښو سره د مبارزې اداره ((په ۱۵۸۸ امنيتي پېښو کې ۵۰۲ کسان وژل شوي ، چې ۲۲۳ ملکي وګړي وژل شوي او ۵۷۰ نور ټپيان دي ، ۱۲۴ امنيتي پرسونل وژل شوی او ۲۴۴ نور ټپيان دي او دغه راز ۱۸ نور د قانون پلي کوونکو ادارو غړي وژل شوي دي.))
په راپور کې که څه هم د سړک د غاړې بمونو پیښې کمې ښودل شوي، خو د وسله والو خوځښتونو پیښې پکې د اندیښنې وړ بلل شوي دي.
د برېتانيا ، امريکا او ملګرو ملتونو لپاره د پاکستان پخوانۍ استازې مليحې لودهی په ډان ورځپاڼه کې په یوه څیړنیزه مقاله کې د پاکستان پوځي رژيم پر وړاندې د امنيتي ، سياسي او اقتصادي برخو کې د موجوده ننګونو لړۍ د يو جدي بحران په توګه ياده کړې چې د واکمن پوځي رژيم سره د خلکو د ملاتړ کچه يې څه باندې ۸۰ سلنه راکمه کړېده .
د سيمهیيز وضعيت څارونکي په خيبر پښتونخوا کې روان امنيتي وضعيت او د پاکستاني رژيم پر وړاندې د مخالفتونو بې ساري زياتوالي ته په اشارې وايي ، له لسيزو راهيسې دغه رژيم د خپلو ګټو لپاره يو شمېر ولسونه نه يوازې له بنسټيزو حقونو بې برخې کړي؛ بلکې هغوی سره يې د بشر ضد جنايتونو پاليسی تعقيب کړې ده .
د سياسي چارو شنونکی معين ګل څمکنی وايي: (( په اوسني حالت کې پاکستان ډېره سخته اقتصادي بې ثباتي لري. په دې وروستیو کې خیبر پښتونخوا کې په زوره خلک له کورونو ایستل کېږي او خلک یې له سختو ستونزو سره مخ کړي دي.))
د سياسي چارو شنونکی توريالی ځاځی بیا ورته خبره کوي خو زیاتوي: (( دا خو په خپله د پاکستان کړنې دي چې په خیبر پښتونخوا کې کېږي او دغه ټول د پاکستان پوځ او ای اس ای کړنې دي او دې ته باید نړۍ متوجه شي او نړیوال باید قاطع پرېکړه وکړي چې له سیمې دغه هېواد ورک شي او په سیمه کې امن راشي. ))
تحریک طالبان پاکستان بیا تر دی دمه دې راپور ته غبرګون نه دی ښودلی، خو په تېرو کلونو کې یې ورته راپورونه رد کړي وو او ویلي وو، چې پاکستان په دا ډول راپورونو کې د عسکرو مرګ ژوبله یا پټوي او یا یې شمیرې خورا کمې ښیي.
