د المرصاد په نوم یوې رسنۍ یوځل بیا د امنیتي سرچینې له قوله راپور ورکړی چې نامعلومو وسله والو د داعش خراسان څانګې دوه مهم غړي وژلي دي.
د يادې رسنۍ د راپور له مخې، وژل شوي کسان يو د پاکستان او بل د تاجیکستان اتباع دي چې د داعش ليکو ته تازه جذب شوي وو.
د المرصاد په راپور کې د امنيتي سرچينو له قوله ادعا شوې چې داعش په افغانستان کې دننه د بریدونو ترسره کولو لپاره له تاجیستاني وګړو څخه کار اخيست.
د المرصاد راپور زیاتوي: « امنیتي سرچینو المرصاد ته ویلي چې په بلوچستان کې د داعش خراسان څانګې یو مهم پاکستانی مسوول له خپل یوه تاجیکستاني ملګري سره یوځای وژل شوي دي. د سرچینو په خبره، د عاصم بلوچ په نامه د داعش خراسان څانګې مهم مسوول چې اصلاً د بلوچستان د مستونګ سیمې اوسېدونکی و، خو په مستونګ کې پر پټنځایونو تر برید وروسته بې ځایه شو، تر دې چې څه وخت مخکې په خضدار کې ناپېژاندو وسله والو په یوه برید کې له خپل یوه بهرني ملګري سره یوځای له منځه یووړ.»
بل پلو، د افغانستان سولې لپاره د امریکا پخواني ځانګړي استازي زلمي خلیلزاد هم په دې اړه غبرګون کې ويلي چې د يادو کسانو د وژل کېدو راپورونه د ريښتيا کېدو په صورت کې ښه پرمختګ دی.
د سیاسي او پوځي چارو کارپوهان په پاکستان کې د داعش خراسان څانګې د مهمو او کلیدي کسانو وژل کېدو په تړاو وېشلي نظرونه لري.
د سیاسي چارو شنونکی محمد زلمی افغانیار وايي: « دا چې خپاره شوي راپورونه ښيي د داعش خراسان څانګې مهم غړي په پاکستان کې وژل شوي، د دې ثبوت دي چې پاکستان لاهم د ګاونډیو او سیمه ییزو هېوادونو د نا امنه کولو هڅه کوي. افغانستان اقتصادي محوریت او د نورو په کورنیو چارو کې د لاسوهنې نه کولو پيغام ورکړی، خو نړۍ د تعامل په ځای تقابل ته مخه کړې.»
د پوځي چارو شنونکی اسدالله ندیم وايي: « ویل کېږي چې په تېرو څو ورځو کې د داعش خراسان څانګې څو مهم مشران په پاکستان کې وژل شوي. ښايي د دغو وژنو تر شا د یوه هېواد د استخباراتو لاس وي، یا هم په استخباراتي پالیسیو کې بدلون راغلی وي.»
بهرنیو چارو وزیر امیرخان متقي موده وړاندې پرته له دې چې د کوم هېواد نوم واخلي، ادعا یې کړې وه چې درې ګاونډي هېوادونه د داعش ملاتړ کوي. شنونکي په کراچۍ او بلوچستان کې د يادې ډلې د غړیو په نښه کېدل، په پاکستان کې د داعش د موجوديت ثبوت ګڼي.
دوی له نړيوالې ټولنې غواړي چې پر پاکستان فشار زيات کړي، ترڅو د سله والو له تمويل او تجهيز څخه لاس واخلي.
د سیاسي چارو شنونکی حمکتالله حکمت وايي: « په پاکستان کې د داعشي ترهګرو د مشرانو وژل کېدل په حقیقت کې موږ او نړۍ ته دا ثبوت په لاس راکوي چې پاکستان لاهم د ترهګریزو فعالیتونو لپاره د نړۍ ترهګریز مرکز دی او غواړي د دې ترهګرو په صادرولو سره سیمه او نړۍ نا امنه کړي. په کراچۍ او بلوچستان کې د جګ پوړو داعشیانو وژل کېدل دا ثابتوي چې د پاکستان پوځ او استخبارات اوس هم له سیمې او نړۍ سره صداقت نه لري بلکې د نویو پروژو اخیستلو هڅه کوي.»
له دې ټولو سره، پاکستان ادعا لري چې د افغانستان له خاورې ورته امنيتي ګواښ موجود دی، خو د افغانستان حکومت يې د ردولو ترڅنګ برعکس وايي، خپله پاکستان او تر کنټرول لاندې سيمو کې يې د داعش مرکزونه شته او په افغانستان کې د يادې ډلې له لوري ترسره شوي بريدونه هم له هماغه ځايه پلان شوي دي.
