په سوېل کې د پکتیا ولایت لجې منګل ولسوالۍ اوسېدونکي وایي، په دغې ولسوالۍ کې هېڅ ډول مخابراتي خدمات نه شته دی او د یوې ټلیفوني اړیکې نیولو لپاره ساعتونه مزل کوي.
دوی زیاتوي، مخکې یې سیمه کې یوه مخابراتي شبکه فعاله وه، خو په خبره یې جګړو کې ویجاړه شوې او اوس د یوې اړیکې نیولو لپاره نورو ولسوالیو او یا هم د غرونو څوکو ته ساعتونه مزل کوي.
د لجې منګل ولسوالۍ یو تن اوسېدونکی وايي:« ستونزه دومره ده، چې د یوه ټلیفون لپاره څمکنیو ته ځو، مخکې یوه پایه فعاله وه، چې اوس ویجاړه شوې ده. دا زموږ لویه ستونزه ده او باید هواره شي.»
د لجې منګل ولسوالۍ یو بل اوسېدونکی بیا وايي:«د اړتیا لپاره کله، چې اړیکه نیسو، څمکنیو او احمدخیلو ولسوالیو ته ځو او یا هم د غرونو لوړو څوکو ته ساعتونه مزل کوو.»
ځايي مسوولین هم په لجه منګل ولسوالۍ کې د مخابراتي خدمتونو نه موجودیت ستره ستونزه یادوي او له مخابراتو وزارت غواړي، چې د هواري لپاره یې ګام واخلي.
د لجې منګل ولسوالۍ ولسوال وايي:« مخابراتي ستونزه بیخي زیاته ده. دلته کار نه کوي، عام ولس او یا هم موږ چې اړیکه نیسو،څمکنیو او یا هم احمدخیلو ولسوالۍ ته ځو.»
د لجې منګل ولسوالۍ د استخباراتو مدیر وايي:« موږ لجه منګل ولسوالۍ کې د مخابراتي خدمتونو د نه موجودیت له کبله له ستونزې سره مخ یو. مخکې یوه پایه فعاله وه، خو اوس د جګړو له کبله ویجاړه شوې ده.»
د لجې منګل ولسوالۍ د مخابراتو مدیر حکمت الله بیا وايي، نږدې راتلونکې کې به دغه ولسوالۍ کې د مخابراتو ویجاړه شوې پایه ترمیم او فعالیت به بېرته پیل کړي.
حکمت الله زیاتوي:« موږ د افغان ټیلي کام له مسوولینو سره خبرې کړي دي. هغوی ډاډ راکړی، چې هغه تخریب شوی سایټ به هم فعال شي او یو بل به هم جوړ شي.»
لجه منګل د ګردیز پټان پر لویه لاره پرته غرنۍ ولسوالي ده، چې د جګړو له امله ورته په هېڅ برخه کې د پام وړ کار نه دی شوی او خلک په کې ان د ژوند له لومړنیو اسانتیاوو بې برخې دي.
