د پاکستان ترکنټرول لاندې قبايلي سيمو، خيبرپښتونخوا او بلوچستان کې د جګړو او ناامنيو له پراخېدو سره هممهاله، د پاکستاني پوځيانو له خوا د عامو خلکو په وژنه کې هم زیاتوالی راغلی.
په وروستیو کې د پاکستان پوځ بې پيلوټه الوتکو د بنو په مامندخېلو کې د عامو خلکو کورونه بمبار کړي چې په پايله کې يې درې ماشومان وژل شوي او يو بل سخت ټپي شوی دی.
دې بريد ځايي سياستوال غوسه کړي او وايي، د پاکستان پوځي رژيم اوس ماشومان هم د مخالفانو په ډول په نښه کوي.
پاکستان کې د ملي جمهوري ګوند مشر محسن داوړ ویلي: « پاکستانی پوځ زموږ ماشومان د خپل ټيکاو لپاره وژني او په داسې حال کې خپله غوسه په بې ګناه ملکي وګړو سړوي چې پر وړاندې يې وسلهوال خوځښتونه نور هم پراخېږي.»
له دې سره هممهاله، د بلوڅانو اړوند د بشري حقونو د څار يوه بنسټ په بلوچستان کې د پاکستاني پوځيانو له خوا په روان زېږدیز کال کې د ترسره شوي تاوتريخوالي راپور خپور کړی.
په راپور کې له ملګرو ملتونو او د بشري حقونو له نړيوالو مدافع سازمانونو غوښتل شوي چې پر پاکستان فشار راوړي، ترڅو په بلوچستان کې د عامو خلکو پر وړاندې تاوتريخوالی بس کړي.
راپور کې زياته شوې، پاکستاني پوځيانو د شنبې په ورځ د بلوچستان په اواران ولسوالۍ کې د ګڼېګوڼې پر يوه بازار د هوان مرمۍ توغولې چې له امله یې د ماشومانو په ګډون ۷ تنه ټپيان شوي.
د بلوڅ غږ عدالت لپاره بنسټ په راپور کې راغلي: « د بلوڅ غږ د عدالت لپاره بنسټ په سمدستي توګه د نړيوالو بشري حقونو له ادارو د مداخلې غوښتنه کوي چې په خپلواکه توګه د دې نسل وژنکو بريدونو څېړنه پيل کړي او د ټپيانو له درمنلې سره هم همکاري وکړي.»
شنونکي وايي، د پاکستان پوځي رژيم تل په قبايلي سيمو، بلوچستان او ترخپل کنټرول لاندې يو شمېر نورو سيمو کې خلک محکوم او ځپلي دي. د دوی په خبره، ياد رژيم د خپل پايښت او نړيوالو متحدينو ته د ژمنتيا لپاره د بشري حقونو رعايت ته هېڅ پاملرنه نه کوي.
د سياسي چارو شنونکی عزیز معارج وايي: « له بده مرغه جنګ او جګړې ټولې دلته کېږي او پروژې له غربي نړۍ اخیستل کېږي. په اسلام اباد او پنجاب کې امن دی، دوی خپل کاروبار او سوداګري کوي، حال دا چې پښتونخوا او بلوچستان په اور کې سوځي.»
په قبايلي سيمو او بلوچستان کې د پاکستان پوځي رژيم له خوا د ملکيانو په نښه کولو تازه راپورونه داسې مهال خپرېږي چې څو ورځې مخکې هم پاکستاني پوځيانو په کورمې ايجنسۍ کې ملکي کورونه او یو جومات بمبار کړل او ملکي وګړو ته یې مرګ ژوبله واړوله.
