د پاکستان جنګي الوتکو د خيبرپښتونخوا په تيرا کې د ترهګرۍ ضد عملياتو په پلمه يو ځل بيا د عامو خلکو کورونه بمبار کړي.
په خواله رسنيو کې د يادو بمباريو په اړه خپرو شویو ویډیوګانو کې ښکاري چې د تیرا اوسېدونکي په کنډواله شویو کورونو کې تر خاورو لاندې شویو کسانو پلټنه کوي.
د راپورونو پر بنسټ، په دې هوايي بریدونو کې د ښځو او ماشومانو په ګډون شاوخوا ۲۵ کسانو ژوند بایللی او پنځه کورونه په بشپړ ډول ویجاړ شوي دي.
له دې بمباریو سره سم، د خیبرپښتونخوا مطرحو سیاستوالو دا بریدونه په سختو ټکو غندلي او له خلکو سره له مشورو وروسته یې د پاکستان حکومت پر وړاندې په پرېکنده دریځ نيولو او ځواب ورکولو ټينګار کړی.
د پښتون ژغورنې غورځنګ مشر منظور احمد پښتین وايي: « د پي ټي اېم مسوولین تیرا ته رسېدلي او لا هم تر کنډوالو لاندې مړي را ایستل کېږي. د سیمې له خلکو سره له مشورې وروسته به د هر ډول مقاومت ملاتړ وکړو. موږ له ټولو پښتنو او په ځانګړي ډول زده کړیالانو غوښتنه کوو چې د دې ظلم پر وړاندې سره یو شي.»
د دې ترڅنګ، د پاکستان تحریک انصاف ګوند مهم غړي چې د یادو بریدونو له امله یې د پراخو لاریونونو ترسره کولو خبر ورکړی زیاته کړې ده چې که په خیبرپښتونخوا کې خواره واره پښتانه د دې ظلمونو پر وړاندې متحد نه شې، د ورته پېښو دوام به یې نور هم وځپي.
د تحریک انصاف ګوند غړی اقبال اپریدی وايي: « زموږ دا مسوولیت دی چې د دې ظلم پر وړاندې ودرېږو. موږ به په ملي شورا کې هم د دې ظلم خلاف غږ پورته کوو، موږ له چا نه ډارېږو او نه پټېږو.»
د راپورونو پر بنسټ، د پاکستان حکومت یو میاشت وړاندې هم په لکي مروت او باجوړ کې د سربه کف په نوم پوځي عملیاتو له امله ګڼو عامو خلکو ته مرګ ژوبله واړوله او سلګونه کورنۍ یې بې ځایه کېدو ته اړې کړې.
د چارو شنونکي په تيرا او نورو قبايلي سيمو کې وضعيت د پاکستان له لوري ترسيم شوی ګڼي او وايي، پاکستاني حکومت پر جکړې سربېره ځايي اوسېدونکي په فرقه يي جګړو کې هم ښکېل کړي او غواړي په دې توګه يادو سيمو کې خپل اهداف ترلاسه کړي.
د سیاسي چارو شنونکی شهسوار سنګروال وايي: « پاکستان په کور دننه ډېرې ستونزې او مشکلات لري، دوی په تیرا، باجوړ او نورو سیمو کې د شیعه او سني په نوم خلک وجنګول، خو کله چې هغه خلک په حقیقت پوه شول، نو دوی مخامخ هوايي بریدونه ورباندې پيل کړل. تېره ورځ یې په دغو بریدونو کې لسګونه ماشومان، ښځې او بوډاګان وژلي او ژوبل کړي دي. پاکستان دا مهال ډېرې ستونزې لري او اوس ورسره د دې ستونزو د کنټرول وس هم نه شته.»
بله خوا، د پاکستان پخواني لومړي وزیر عمران خان چې اوس مهال په زندان کې دی، یو ځل بیا د پاکستان حکومت په امنیتي، سیاسی او اقتصادي برخو کې ناکام بللی او د دې هېواد په قومي اسمبلې کې يې د خپل ګوند له استازو غوښتي چې یادې اسمبلۍ ته له ورتګ ډډه وکړي.
