د پاکستان سولې او مطالعاتو انسټېټېوټ په خپل تازه راپور کې ویلي، په دې هېواد کې د امنیتي پېښو کچه لوړه شوې ده.
د یاد انسټېټېوټ د راپور پر بنسټ، په تېر یوه کال کې په پاکستان کې څه باندې ۵۰۰ بریدونه ترسره شوي چې له امله یې له ۸۵۰ ډېر کسان وژل شوي.
راپور زیاتوي، د وژل شویو له ډلې نږدې ۵۰۰ یې امنیتي منسوبین وو.
دغه راز په راپور کې وړاندې ویل شوې، ډېری دغه بریدونه په خیبر پښتونخوا او بلوچستان کې شوي دي.
د راپور یوه برخه: « تېر کال په خيبر پښتونخوا، پلوچستان او د پاکستان په یو شمېر نورو سیمو کې ۵۲۱ بریدونه شوي. د دغو بریدونو له ډلې ۲۹۵ په خیبر پښتونخوا، ۲۰۲په بلوچستان، ۱۱ په پنجاب، یو برید په اسلام اباد او ۱۰ نور په کراچۍ کې ترسره شوي دي. په دغو بریدونو کې ۸۵۲ تنه وژل شوي چې ۴۸۹ یې امنیتي منسوبین وو او پاتې نور یې ملکي وګړي دي.»
د سیاسي چارو شنونکی شهزاده مسعود وايي: « په پاکستان کې چې څه روان دي او څه کېږي، دا د پاکستان د خپلو اعمالو پایله ده. زه فکر کوم دوی هغه څه رېبي چې کرلي یې دي. موږ د پاکستان په کورنیو ستونزو کې هېڅ کار نه لرو، دا د دوی خپله کورنۍ مساله او پړه یې هم باید په نورو وا نه چوي. دوی باید په خپلو پالیسیو کې اساسي تغییر راولي او له افراطیت لاس واخلي.»
په ورته مهال، پاکستان کې ازاد خبریالان وايي، د دوی د مالوماتو له مخې، د تېر پرتله په پاکستان کې ناامني زیاته شوې او ورسره د مرګ ژوبلې کچه هم لوړه شوې ده.
په پاکستان کې ازاد خبریال طاهر خان وايي: « په پاکستان کې چې د تېر کال د امنیتي وضعیت په اړه څومره راپورونه ورکړل شوي یا هم د حکومت او پوځ له خوا پرې بیانونه ورکړل شوي، په ټولو کې په یوه خبره اتفاق دی چې په پاکستان کې د تشدد پېښې زیاتې شوې دي او په پایله کې یې ځاني زیان او تلفات هم زیات شوي، په ځانګړې توګه خیبر پښتونخوا او بلوچستان کې. دا ښکاره خبره ده چې د دې ضیمه وار د پاکستان وسله والې ډلې دي او بیا د بلوڅانو ډلې دي.»
د سیاسي چارو کارپوهان په دې اند دي چې په پاکستان کې روان حالات د دې هېواد د ناسمو ستراتیژیو پایله ده.
دوی خبرداری ورکوي، که اسلام اباد په خپل دریځ او ستراتیژیو کې بدلون رامنځته نه کړي او د ترهګرۍ د پاللو پرځای له ګاونډیانو سره په ښو اړیکو تمرکز ونه کړي، وضیعت به یې نور هم پیچلی شي او بیا به یې کنټرول ورته ستونزمن وي.
د سیاسي چارو کارپوه قریب الرحمان شهاب وايي: « هغه څه چې په پاکستان کې واقع کېږي، د پاکستان د خپلو اعمالوپایله ده. که د دوی په پالیسیو او ستراتیژیو کې بدلون را نه شي او د ترهګرۍ د پاللو پر ځای په نورو مسایلو، اقتصادي ګټو او ګاونډیانو سره په ښو اړیکو تمرکز ونه کړي، فکر کوم دا نا امنۍ به نورې هم زیاتېږي، دا اور به نور هم تودېږي او یوه ورځ به د اسلام اباد لمنې ته رسېږي.»
ځینې نور بیا د پاکستان د ناامنیو په اړه بېل نظر لري او وايي، دا چې د پاکستان امنیتي ادارې نه شي کولی په خپل هېواد کې روان امنیتي وضیعت کنټرول کړي، لامل یې له جنګېدونکو وسله والو ډلو ولسي ملاتړ دی.
د پوځي چارو کارپوه یوسف امین ځاځی وايي: « کوم خلک او ډلې چې د پاکستان له حکومت سره جنګېږي، یوه برخه د پاکستان د ولس ده. دوی خپلې غوښتنې لري او د پاکستان حکومت باید له دوی سره خبروې ته کېني او غوښتنې یې ومني. دا چې دوی یې نه شي کابو کولی یا یې امنیتي ځواکونه توانمندي نه لري، علت یې دا دی چې دا خلک د ولس یوه برخه ده.»
اسلام اباد بیا تل په پاکستان کې د امنیتي پېښو ګوته افغان لوري ته نیولې او ادعا کوي چې له افغان خاورې ورته ګواښ پېښ دی؛ خو د افغانستان حکومت تل دغه تورونه په کلکه رد کړي او ډاډ یې ور کړی چې د افغانستان له خاورې به هېڅ یوه هېواد ته ګواښ پېښ نه شي.
