تېر دوه کاله د پاکستاني ځواکونو لپاره له دې امله تر نورو ځکه سخت وو چې په کې نه یوازې د مخالفو وسله والو جبهو له لوري خونړي بريدونه شوي بلکې ګڼې سيمې يې له کنټروله هم وتلې دي.
د جګړې دغو برعکس پايلو ته په کتو د پاکستان دفاع وزیر د ياد هېواد پارلمان ته منلې چې ياده موده ځکه له نورو زياته له ناخوالو ډکه وه چې ډېر شمېر پاکستاني سرتېرې په کې وژل شوي.
خواجه آصف د دې هېواد پارلمان ته خبرو کې ويلي، تېرو دوو کالو کې د پاکستاني طالبانو تحریک (ټي.ټي.پي) او بلوڅ آزادي غوښتونکي غورځنګ(بي.اېل.اې) له خوا د پاکستان ۷۰۰ امنيتي سرتېري وژل شوي او ګڼ شمېر نور ژوبل شوي دي.
نوموړي د يادو بريدونو د شدت له امله دا ځل د افغانستان پر ځای د ملامتۍ ګوته هند ته نيولې او ادعا يې کړې چې د پاکستاني طالبانو تحریک او بلوڅ آزادي غوښتونکو په شمول د پاکستان ضد عناصرو کلک ملاتړ کوي.
آصف زیاته کړې: « پاکستان په تېرو دوو کالو کې په پرله پسې ډول د ترهګرۍ پر وړاندې مبارزه کړې. په دې مبارزه کې ۷۰۰ سرتېري وژل شوي او ګڼو ملکيانو ته هم په کې مرګ ژوبله اوښتې. دلته ځينې سیمې د ترهګرو له خوا هدف ګرځي. دلته که ټيټيپي ده او که بياېلاې، ټول ملاتړ يې د هند له لوري کېږي. هغوی چې د پاکستان دوښمن په خوښه دلته بریدونه کوي، د پاکستان دوښمنان دي او هغوی چې له دغو خلکو ملاتړ کوي او یا خواخوږي ورسره لري، هغه پاکستانیان نه دی.»
په ورته مهال، د سیاسي چارو شنونکي وايي، پاکستان نه یوازې له امنیتې پلوه له ننګونو سره مخ دی بلکې په سیاسي او اقتصادي لحاظ هم په يوه لوېدلي حالت کې ځای لري.
د دوی په باور، د پاکستان پوځ او امنيتي ځواکونو پر ملکي خلکو د زور زياتي له امله ولسي ملاتړ په بشپړه توګه بايللی او له همدې کبله وسله والې ډلې د جګړې په ميدان کې پرې برلاسې دي.
د سیاسي چارو شنونکی فیض محمد ځلاند وايي: « اوس مهال ولس له پاکستاني طالبانو ملاتړ کوي، ځکه طالبان د همدې ولس له منځه راوتي خلک دي، په ولس کې ځای لري او په ډېره اسانۍ سره کولی شي هغه کسان پر نښه کړي چې د پولیسو او پوځیانو په نامه د پاکستان له پوځ سره کار کوي او بیا بېرته ځان په ولس کې ورک کړي.»
ځینې نور بیا په دې اند دي چې د پاکستان امنیتي ځواکونه د ولس پر وړاندې ځان مسوول نه ګڼي او دې انحراف يې په جګړه کې ماتې يقيني کړې ده.
د دوی په خبره، که حکومت يې د خلکو غوښتنې ونه منې، لرې نه ده چې ټول ولس به يې د پوځ او امنيتي ځواکونو پر ضد پاڅون وکړي.
د سیاسي چارو شنونکی واحد فقيري وايي: « د دې بل لامل دا هم دی چې د پاکستان حکومت په دې نه دی بریالی شوی چې د خلکو مشروع غوښتنې ومني. اقتصاد پر ځوړ روان دی، امنیت خراب دی، سیاسي بحران شته او ملي ډیالوګ نه شته.»
د پاکستان ملکي او پوځي چارواکي د هند پر وړاندې دا ډول څرګندونې وروسته له هغې کوي چې نوي ډيلي د تېرې مې مياشتې پر ۷مه په پاکستان کې دننه ځينې اهداف پر نښه کړل او ادعا يې وکړه چې په نښه شوي اهداف د هند ضد وسله والو ډلو پنټځايونه وو.
