د پاکستان امنیتې وضعیت ورځ تر بلې مخ په خرابېدو روان دی، داسې چې په دې وروستیو کې يې د امنیتي ځواکونو مرګ ژوبله تر بل هر وخت لوړه شوې ده.
په پاکستان کې د شخړو او امنیت څېړنیز انسټیټیوټ په خپل خپاره کړي راپور کې، روان زېږدیز کال د پاکساني ځواکونو لپاره خونړی ياد کړی او ويلي دي چې يوازې په تېره مارچ مياشت کې د چاودنو او وسله والو بريدونو په پرمهال ۷۳ پوځيان وژل شوي او لسګونه نور ژوبل شوي دي.
د راپور یوه برخه: « د دې مرکز شمېرې ښيي چې د روان کال مارچ میاشت کې د چاودنو او وسلوالو بريدونو پرمهال ۷۳ پوځيان وژل شوي ۸۸ نور ژوبل شوي دي. دغه راز، د مارچ میاشتې په اوږدو کې ۶۷ ملکي وګړي په امنیتي پېښو کې وژل شوي او ۲۵۸ کسان ټپیان شوي هم دي.»
د دې مرکز مسوولینو پاکستان کې د پوځي عملیاتو پراخېدل د پاکستان د امنیتي او دفاعي ځواکونو د مرګ ژوبلې د ډېرېدو لاملونه بللي دي.
په ياد راپور کې خیبرپښتونخوا او بلوچستان هغه سيمي ښودل شوي چې د ناامنۍ پېښې په کې د نورو سیمو پرتله زياتې دي.
همدا راز په راپور کې راغلي چې په مارچ مياشت کې د پاکستان په پنجاب ايالات کې هم د ناامنیو پېښې د پام وړ زيات شوې چې د زياتو بريدونو مسووليت يې د پاکستاني طالبانو تحریک پر غاړه اخیستی.
د سیاسي چارو شنونکي وايي، د پاکستان اوسنی وضعيت بحراني دی او حکومت یې نه شي کولی خپله واک سیمه کې روان بد حالت مهار کړي.
د سیاسي چارو شنونکی اخترمحمد راسخ وايي: « زه ویلی شم چې د پاکستاني ځواکونو لپاره تردې هم خونړۍ میاشتې را روانې دي او تر هغو به ادامه ولري چې د پاکستاني نظامیانو، سیاستوالو او اسختباراتي کړیو پلانونه په سیمه کې ناکام شي.»
د سیاسي چارو شنونکی توریالی ځاځی وايي: « دا بریدونه او جنایتونه ټول د پاکستان د پوځ او (آی.اېس.آی) له خوا ترسره کېږي. آیا تاسو پوهېږئ چې دوی په خیبرپښتونخوا او بلوچستان کې څومره ولسونه ووژل؟ زه په زغرده وایم چې د پاکستان وضعیت به له دې هم بدتر شي او د تجزیې خواته به ځي. د دې لپاره چې انسانان د آزاد ژوند حق لري، نو په پاکستان کې له تجزیې پرته بله لار نه شته.»
پاکستاني چارواکو په وار وار ادعا کړي چې په دې هېواد کې د ناامنیو پېښې په یو نه یو ډول له افغانستان سره تړاو لري او اسلامې امارت یې باید د مخنیوي لپاره رغنده ګامونه واخلي.
خو د اسلامي امارت سرپرست حکومت چارواکي وايي، پاکستان کې امنیتي پېښې د دې هېواد کورنۍ موضوع ده او له پاکستاني چارواکو یې غوښتي چې پر افغانستان د تورونو لګولو پر ځای دې د خپل ناامنه هېواد امنيت ټینګ کړي.
