په غزې کې د دايمي اوربند لپاره لا هم باوري تضمين نه دی ترلاسه شوی، خو د واشنګټن له لوري هلته د جګړې درولو هڅو عملي بڼه خپله کړې.
د راپورونو له مخې، په غزې کې د اوربند لپاره د امريکا ولسمشر ډونالډ ټرمپ له لوري د وړانديز شوې طرحې مهم شرطونه حساس دي او هر شېبه له طرحې د سرغړونې خطر موجود دی.
په تدریجي توګه د حماس بې وسلې کېدل او د يوه مکانېزم له مخې يې د فلسطين په حکومتي ځواکونو کې د جنګياليو ادغام د هوکړې سخت شرطونه دي او د نه پلي کېدو په صورت کې د اسرایيلو له خوا له يادې طرحې سره د احتمالي مخالفت خطر لا پر ځای دی.
خو له دې اندېښنو سره، حماس د اسراییلو ټول برمته نیولي وګړي خوشې کړل او تمه ده چې اسرایيل به هم په ورته اقدام کې شاوخوا ۲زره فلسطينيان خوشي کړي.
له بلې خوا، د امريکا ولسمشر ډونالډ ټرمپ د شرم الشيخ په ناسته کې له ګډون وړاندې اسرایيلو ته تللی او هلته يې د دې هېواد پارلمان يا کېنېسټ ته وينا کړې. ټرمپ الوتکې ته د پورته کېدو پر مهال خبريالانو ته په تکرار ويلي چې د غزې جګړه يې پای ته رسولې.
د امريکا ولسمشر ډونالډ ټرمپ ویلي: « تاسو په دې پوه شوئ چې جګړه نوره پای ته رسېدلې.»
د شرم الشيخ په ناسته کې د بریټانیا، جرمني، فرانسې، هسپانیا، ايټاليا او يو شمېر نورو لوېديځو او عربي هېوادونو مشرانو ګډون کړی او د ملګرو ملتونو پر چارواکو سربېره د نړيوالو سازمانونو استازي هم ورغلي دي.
د بریټانیا لومړي وزير ويلي، هېواد يې د غزې له اقتصادي پرمختګ سره مرسته کوي او په سيمه کې د ثبات پلوی دی.
د بریټانیا لومړی وزير کې یرسټارمر ویلي: « بریټانیا چمتو ده چې د غزې په بیا رغونه کې مرسته وکړي او موږ به له خپلو شریکانو سره کار وکړو، تر څو د سیمې لپاره یوه باثباته راتلونکی یقیني کړو.»
د الجزيرې د راپور له مخې، په غزې کې اوس خلک خوړو، درملو او استوګنځايونو ته جدي اړتيا لري. دوی خپلو سيمو ته له ستنېدو وروسته اوس په کنډواله شويو کورونو کې ژوند کوي.
په بشري چارو کې د ملګرو ملتونو د سرمنشي مرستيال وايي، له يک شنبې راهيسې يې په غزې کې د بشري مرستو رسولو پروسه چټکه شوې.
په بشري چارو کې د ملګرو ملتونو سرمنشي مرستیال ټام فليچر وايي: « زموږ د بشرپالنې هڅې په غزې کې چټکې شوې دي. پرون مو يو څه ریښتینی پرمختګ وکړ.»
د ګارډين ورځپاڼې د راپور پربنسټ، له مصر وړاندې اسراييلو ته د امريکا ولسمشر ډونالډ ټرمپ د سفر موخه له اسرایيلي چارواکو څخه د اوربند طرحې په اړه د ملاتړ ترلاسه کول وو.
خو يو شمېر نړيوالو رسنيو بيا په شرم الشيخ ناستې کې چې د غزې اوربند لپاره حياتي ارزښت لري، د اسراییلو د استازي ګډون نه کول، د اوربند اوږدمهاله هوکړې پر وړاندې د جدي خنډ په توګه مطرح کوي. دوی وايي، په دې غونډه کې به له اسرایيلو څخه د تضمين هېڅ ډول سند وجود ونه لري.
