ټاکل شوې د راتلونکې مې مياشتې پر ۲۷ نېټه د مسکو په کوربه توب د کازان غونډه پیل او د دې مياشتې تر ۲۹ نېټې پورې به دوام وکړي.
د مالوماتو له مخې، دغهې ناستې ته د افغانستان په ګډون د ۱۵۰ هېوادونو استازي وربلل شوي او تمه ده چې په دې ناسته کې به تر ډېره د نړۍ پر کچه په اقتصادي او امنیتي مسایلو بحثونه وشي.
ټاس خبري آژانس د روسيي د ملي امنیت شورا د منشي سرګي شویګو له قوله لیکلي، یاده ناسته کې به د ختیځو او لوېديځو هېوادونو اړوند مسايلو له بحث سربېره، د سيمې د امنيت ټېنګښت لپاره پر ګډو همکاريو هم خبرې وشي.
د ټاس خبري آژانس د شویګو له خولې لیکلي: « موږ پرېکړه کړې چې په دې ناسته کې د ختیځ او لوېديځ هېوادونو پر کچه پر امنیتي مسایلو خبرې او یو بل سره د همکارۍ په تړاو بحث وکړو. موږ هیله من یو چې تر۱۵۰ زیاتو هېوادونو استازي به په دي ناسته کې له موږ سره ګډون وکړي.»
دا په داسې حال کې ده چې تېره اوونۍ په کابل کې د روسیې سفیر د اوبو او انرژۍ سرپرست وزیر سره په لیدنه کې نوموړي ته په کازان ناسته کې د ګډون بلنه ورکړه، خو سرپرست حکومت تر اوسه په دې ناسته کې د ګډون یا نه ګډون په تړاو رسمي څه نه دي ویلي.
د سیاسیي چارو شنونکي دا او ورته نورې ناستې د افغانستان اړوند مسايلو او ستونزو مطرح کولو لپاره غوره فرصت بولي او د افغان پلاوي په ګډون ټینګار کوي.
د سیاسي چارو شنونکی ادریس محمدي ځاځی وايي: « هره غونډه او هر ډول لیده کاته چې د نړۍ په هره برخه کې وي، خو چې اجنډا یې د افغانستان جوړښت، د افغانستان اقتصادي وده، سیاست او د امنیت رغښت وي، موږ ترې لبیک وايو. باید هلته د اسلامي امارت استازی شتون ولري، ترڅو د خپلو نظرونو او راتلونکو پلانونو اظهار په کې وکړي.»
ځینې نور بیا وايي د کازان ناستې له فرصت په ګټې اخیستنې دې د سرپرست حکومت چارواکي خپل پرمختګونه د دې غونډې له ګډونوالو سره شريک کړي.
د نړیوالو اړیکو شنونکی نجیب الرحمن شمال وايي:« په افغانستان، سیمه او نړۍ کې له امنیتي خطرونو د مخنیوي، تروریزم، نشه يي توکو او نورو ګواښوونو پر وړاندې مبارزې لپاره د هڅو پر شریکولو به بحث وشي. دغه بحثونه په افغانستان او سیمه کې د سولې او ثبات د ټینګښت لپاره مهم دي او هیله لرم د اسلامي امارت چارواکي له دې فرصت څخه ښه ګټه واخلي.»
روسیه له تېرو څو کلونو را هیسې د نړۍ د بېلابېلو هېوادونو د استازو په ګډون ورته غونډې جوړوي او تر ډېره د سيمې او نړۍ پر اقتصادي، امنیتي او سیاسي مسایلو په کي بحثونه کېږي.
شنونکي د کازان راتلونکې ناستې ته تمه لري چې افغانستان لپاره د بهرنۍ پانګې په جذب کې به مهم رول ولري.
