يو بل ته ایران او اسراییلو له ګوتڅنډونو او خبرداریو سره سم، دواړه خواوو د پنځمې ورځې لپاره هم پر یو بل د ډرون او جنګي الوتکو او توغندیو سخت بریدونه کړي.
د راپورونو له مخې، اسراییلو تېره شپه د ایران ملي راډیو ټلوېزيون په ګډون ګڼ ملکي او پوځي اهداف پر نښه کړي.
د دې ترڅنګ د اسراییلو پوځ ویلي، په دې بریدونو کې یې د ایران ځمکنیو توغندیو پر یوه کارخونه او د توغندیو توغولو پر تاسیساتو د برید ترڅنګ، د دقیقو استخبارتي مالوماتو له مخې، د ایران د خاتم الانبیا مرکزي قرارګاه قوماندان علي شادماني هم له منځه وړی.
د اسرائیلو پوځ زیاته کړې: « د ایران د مذهبي مشر علي خامنه يي پوځي سلاکار او د ایران تر ټولو لوړ رتبه پوځي جنرال علي شادماني د دقیقو استخباراتي مالوماتو پر اساس، د اسراییلو هوايي ځواکونو له لوري د تهران په مرکزي برخه کې ووژل شو.»
د ایران د انقلابي ګارډ ځواکونه وايي، تېره شپه یې پر اسراییلو د ډرون او توغندیز بریدونو نهمه لړۍ پلې کړه چې د پلازمېنې تل ابیب د ګڼو سيمو ترڅنګ يې د اسرایيلو د استخباراتي ادارې يا موساد ودانۍ هم پر نښه کړې.
دوی زیاتوي، د دوی سایبري موندنې ښيي چې د اسراییلو له ګڼو ښارونو خلک د جګړې له ویرې د قبرس ټاپو ته د تېښتې په حال کې دي.
د ايران دفاع وزارت وياند علي رضا طلايي نېک وايي: « نن مو د صهیونېستي رژيم استخباراتي او اطلاعاتي مرکز په یوه هدف وېشتونکي او کنټرول کېدونکي توغندي په داسې حال کې په نښه کړی چې د دوښمن له خوا د امریکا په مرسته له شدید هوايي ضد سیسټم تېر شوی او خپل هدف یې ویشتلی دی.»
بله خوا، د ایران ولسمشر د ترکیې له ولسمشر رجب طیب اردوغان سره په ټيلفوني خبرو کې ویلي، اسراییلو د جګړې د پيلوونکي اړخ په توګه باید د نوموړي په ټکو د خپلو جنایتونو ځواب وویني.
مسعود پزشکیان زياته کړې، که اسراییل په هره کچه پر ایران برید وکړي، ځواب به یې په هماغه اندازه بېرته ترلاسه کړي.
پزشکیان په دې اړه ویلي: « جګړه موږ نه ده پیل کړې؛ خو د صهیونیستي رژیم د جنایتونو ځواب ورکوو. دوی که په هره کچه پر موږ برید وکړي، په هماغه کچه به بېرته ځواب ورکړل شي.»
بله خوا، د امریکا ولسمشر یو ځل بیا پر ایران نیوکه کړې چې په تېرو دوو میاشتو کې یې ولې له امریکا سره هوکړه ونه کړه او له کبله یې اوس مخامخ جګړې ته لار هواره شوه.
ډونالډ ټرمپ ویلي، په هېڅ صورت اجازه نه ورکوي چې ایران اټومي وسلې ولري.
ټرمپ په کانادا کې د جي۷ هېوادونو ناسته په نیمايي کې پرې اېښي او بېرته امریکا ته ستون شوی.
هغه که څه هم د دې ناڅاپي تګ لامل بله مهمه موضوع یاده کړې، خو د فرانسې ولسمشر په نیمايي کې د ټرمپ له لوري د ناستې پرېښودو لامل د ایران او اسراییلو ترمنځ د اوربند اړونده مساله بللې.
په ورته مهال د فاکس نیوز د مالوماتو له مخې، نوموړي د جي۷ هېوادونو له ناستې د بېرته راګرځېدو سره سم د امریکا د ملي امنیت شورا د بېړنۍ ناستې د جوړېدا امر کړی.
ټرمپ ویلي: « ایران باید د اټمي مذاکراتو هوکړه لاسلیک کړې وای. ما هغوی ته وویل چې لاسلیک یې کړئ. ډېر د شرم ځای دی چې انسانان له منځه ځي. دا ډېره ساده خبره ده. ایران نه شي کولی چې هستوي وسله ولري. ما څو څو ځله ویلي! ټول باید په بېړه له تهران ووځي.»
له دې ټولو سره، تېره ورځ کاناډا هېواد د جي۷ هېوادونو د اقتصادي ناستې کوربه و چې په اجنډا کې پر شاملو موضوعاتو د بحث ترڅنګ، د ایران او اسراییلو پر روانې جګړې هم بحث شوی.
د فرانسې ولسمشر اېمانويل مکرون ویلي، د اسرایيلو او ايران ترمنځ د اوربند غوښتونکی دی.
هغه زياته کړې، د اوربند د ټینګښت په صورت کې به اروپايي هېوادونه له ایران سره په جدي مذاکراتو کې برخه واخلي.
د فرانسې ولسمشر زیاته کړې: « موږ د اوربند غوښتونکي یو او د امریکا او ایران ترمنځ هستوي پروګرام په اړه مذاکرات باید بېرته پيل شي. اروپايي شریکان دې ته چمتوو دي چې اوربند ته د رسېدو په صورت کې له ایران سره په جدي مذاکراتو کې ګډون وکړي. امریکا له ایراني چارواکو سره د لیدنې وړاندیز کړی او وبه لیدل شي چې څه کېږي.»
خو د ایران ولسمشر د ایران پارلمان ته په وروستۍ وینا کې د امریکا او اسراییلو خبره ردوي او وايي، نه غواړي اټومي وسله ولري او د یورانیمو د غني کولو پروسه یې سوله ییزه او د ځان حق ګڼلې.
هاخوا د هند بهرنیو چارو وزارت په یوې اعلامیه کې له خپلو اتباعو غوښتي چې ژر تر ژره له ایران ووځي او یا خوندي ځایونو ته پناه یوسي.
دې هېواد دوه ورځې وړاندې په اسراییلو کې هم خپلو اتباعو ته امنیتي خبرداری ورکړی و.
