د سعودي عربستان په کوربتوب په اوکراین کې د جګړې پای ته رسولو لپاره د امریکا او روسیې د مخامخ خبرو اترو له امله، د امریکا او یو شمېر روپا هېوادونو اړیکې ترېنګلې کړې دي.
د تېرې جمعې پر د اوکراین ولسمشر له خپل امریکايي سیال ډونالډ ټرمپ سره په لېدنه کې هغه اهداف ترلاسه نه کړل چې کيف یې له مسکو سره د جګړې لپاره مهم او حياتي بولي.
له واشنګټن د اوکراین ولسمشر بې پایلې او له مخالفتونو او نیوکو ډک سفر وروسته، نوموړی د اروپايي هېوادونو په ناسته کې د ګډون په موخه لندن ته رسېدلی.
د بریټانیا لومړي وزیر له ولودیمیرزېلېنسکي د تود هرکلي ترڅنګ له اوکراین بشپړ پوځي ملاتړ اعلان کړ چې په همدې موخه یې په اروپا کې د روسیې له کنګل شویو پیسو څه باندې ۲ میلیارد پونډه د اوکراین پوځي ملاتړ ته ورکړل.
د بریټانیا لومړي وزیر کیېر سټارمر په دې اړه وویل: « اجازه راکړه چې ووایم تاسې ډېر ډېر ښه راغلاست. تاسې به په ډاونېنګ کې د خلکو خوښي لېدلي وي. تاسې په بریټانیا کې بشپړ ملاتړ لری. موږ له تاسو او د اوکراین له خلکو سره ولاړ یو. د اوکراین لپاره تلپاتې سوله، حاکمیت او ثبات ډېر مهم دي.»
د اوکراین ولسمشر ولادیمیر زېلېنسکي له روسیې سره په څه باندې دوه کلنه جګړه کې د بریټانیا پوځي ملاتړ وستایه او دغه هېواد یې د کیف ښه متحد وباله.
د اوکرايین ولسمشر په دې اړه وویل: « ما نور خلک هم ولیدل. د بریټانیا له پوځي ملاتړ ډېر منندوی یم. تاسې د جګړې له پیل راهیسې اوکراين سره ستر پوځي ملاتړ کړی او سبا ته مو چې کومه ناسته راغوښتې، له اوکراین سره د ملاتړ لپاره مهم او تاریخي حیثیت لري.»
خو پر نړیواله کچه د زبر ځواکونو ترمنځ د اوکراین د سولې په اړه اختلافونه او هلته د جګړې درول یا ادامه ورکول به په آسیا او ځانګړي ډول افغانستان څه اغېزې ولري؟
د سیاسي چارو شنونکی فیض محمد ځلاند وايي: « که چېرې د اوکراین د سولې په خبرو کې پرمختګونه رامنځته کېږي، دا به د سیمې او نړۍ امن ته لاره هواره کړي او د نړۍ پام به افغانستان ته لا زیات شي. موږ به وکولی شو د اوکراین له سولې سره د افغانستان معضله کې د نړۍ پام ځان ته ولرو.»
د سیاسي چارو شنونکی نجیب الرحمن شمال وايي: « په داسې حال کې چې له تېرو درېیو کالو راهیسې روسیه او اوکراین په جګړه کې دي، دغې مسالې له ګاونډیو هېوادونو او په ځانګړې توګه مشترک المنافع هېوادونو سره د روسیې اقتصادي اړیکو ته ډېر منفي زیان اړولی. دغه کار په افغانستان کې پر بشردوستانه مرستو هم ناوړه اغېز کړی او زه هیله لرم دغه جګړه ژر تر ژره پای ته ورسېږي، ترڅو په سیمه، نړۍ او افغانستان یې منفي اغېزې هم کمې شي.»
دا په داسې حال کې ده چې کرېملین چې تازه یې واشنګټن ته د نوي سفیر له استولو سره هوکړه شوې، د ولسمشر ټرمپ له لوري د اوکراین له ولسمشر سره شوی چلن ستایلی دی.
