په غزې کې د بشري جنایت د ارتکاب او د اسرائیلو له لوري د جګړې او نړیوالو اصولو د نقض په تړاو د ملګرو ملتونو او یو شمېر هېوادونو له اندېښنو وروسته اوس د امریکا بهرنیو چارو وزیر انټوني بلېنکن ته په ځېنې یادښتونو کې د دې وزرات یو شمېر لوړپوړو کارکوونکو له اسرائیلو سره د امریکا د ملاتړ او پوځي مرستو پر استعمال اندېښنه ښودلې.
په دې یادښتونو کې چې رویټرز خبري اژانس خپاره کړي راغلي، چې ښايي دغه هېواد په غزه کې د حماس ډلې د ځپنې په پلمه له دغو وسلو او د امریکا له ملاتړ څخه ناوړه ګټه پورته کړي او نړیوال اصول یې نقض کړي وي.
د امریکا د ملي امنیت په یوه یادښت کې چې په تېره فبروري میاشت کې د ولسمشر جوبایډن له لوري صادر شوی، له مخې یې انټوني بلېنکن اړ دی چې کانګرس ته په غزې کې د امریکايي وسلو د سمې کارېدنې او د نړیوالو قوانینو د نه نقض په تړاو وضاحت ورکړي.
د امریکا بهرنیو چارو وزارت ویاند مټیو مېلر وايي: « په بېلابېلو متضادو موضوعاتو کې د امریکا بهرنیو چارو وزیر ګڼو نظریاتو ته غوږ نیسي او په اړه یې فکر کوي.»
له دې سره ویل کېږي چې انټوني بلېنکن چې تازه چین ته تللی، ټاکل شوې، نن دوشنبه سعودي عربستان ته ولاړ شي او هلته به په غزه کې د احتمالي اوربند او د حماس له لوري د یرغمل شویو کسانو د ازادېدو په موخه د دې هېواد له چارواکو سره خبرې وکړي.
د امریکا د بهرنیو چارو وزارت ویلي، بلېنکن به د خپل دې دوه ورځني سفر په لړ کې په سیمه کې له خپلو شریکانو سره غزې ته د بشري مرستو پر لېږد او اړتیا بحثونه ولري.
مټیو مېلر زیاته کړې: « بلېنکن به په دې سفر کې غزې ته د ترسره شویو لا زیاتو بشري مرستو او دې مرستو ته د لا زیاتې اړتیا پر سر بحث او ټینګار وکړي.»
په ورته مهال حماس ډلې د هغو دوو اسرائیلي یرغمل شویو کسانو تازه ویډیو خپره کړې، چې یاد کسان له عامو اسرائیلیانو غواړي څو د دوی د ازادېدو لپاره پر اسرائیلي حکومت فشار زیات کړي.
د یادو یرغمل شویو کسانو کورنۍ هم له حکومته غواړي، څو د شاوخوا ۲۵۰ برمته شویو کسانو د ازادېدو لپاره چې د تېر کال د اکتوبر میاشتې راهیسي یرغمل دي، خپل ټول توان وکاروي.
یرغمل شوی کېټ سیګل وايي: « ډېر کله داسې فکر کوم، چې تاسې به موږ پرېښي یاست. زه له لومړي وزیر او نورو چارواکو غواړم، چې په نږدې راتلونکي کې د خبرو اترو لپاره انعطاف وښيي. موږ د دې خبرو اترو د پیلېدا لپاره د ځنډ احساس کوو، چې ښايي ډېر وخت ونیسي.»
د اسرائیلي ځواکونو له لوري په غزه کې د نړیوالو اصولو د نه مراعت او نقض په تړاو، امریکايي چارواکي داسې مهال اندېښنه ښيي چې تېره اوونۍ فلسطیني چارواکو د خان یونس سیمې اړوند د یوه روغتون په انګړ کې په درېیو جلا ډلهییزو قبرونو کې ۳۹۲ مړي موندلي وو چې د ډېرو هغو په ځان کې د روغتون جامې وې.
