د سېشنبې پر ورځ په غزه کې د اسراییلو او حماس جګړې دوه کاله پوره شول.
دوه کاله وړاندې په همدې ورځ اسراییلو د هوا او ځمکې له لارې پر غزې د پراخو پوځي عملیاتو پرېکړه اعلان کړه.
د الجزیرې ټلوېزیون د راپور پر بنسټ، پر اسرایيلو د حماس برید کې شاوخوا ۱۱۳۹ اسرایيليان ووژل شول او ۲۰۰ نور د ياد غورځنګ له لوري يرغمل شول، خو پر غزې د اسراییلي پوځیانو خونړيو بریدونو د دوام په پایله کې تر دې دمه څه باندې ۶۷ زره فلسطیني وګړي شهیدان او نږدې ۱۷۰ زره نور ټپیان شوي.
دغلته د جګړې د دوو کلونو تېرېدو په اړه حماس ويلي، چې اسرایيل د اوږمهاله جګړې له لارې د فلسطينيانو نسل وژنې ته دوام ورکوي او غواړي له خپلې خاورې يې وباسي.
دې غورځنګ نړۍوال او په ځانګړې توګه عربي هېوادونه تورن کړي، چې په غزه کې يې له روان وضعیت سره خواخوږي او همکاري له شرمه ډکه وه.
یاد غورځنګ ویلي: «اسراییلو د بې دفاع فلسطیني وګړو پر وړاندې خپل وحشي بریدونه دوامدار ساتلي. نړۍواله همکاري چوپه ده او عربي هېوادونه په مرسته کولو کې ناکامه شوي.»
امريکا په دې جګړه کې دوه ډوله رول، چې يو يې د دوام لپاره د اسرایيلو تسليحاتي ملاتړ او بل يې د درولو لپاره د منځګړي هغه دی، ادا کوي. د جګړې درولو هڅو په لړ کې يې يوه شل مادهييزه طرحه وړانديز کړې، چې پر بنسټ يې په مصر کې د حماس او اسرایيلو ترمنځ مذاکرات هم پيل شوي او پرمختګونه پکې دي.
د امریکا ولسمشر ډونالډ ټرمپ وايي: «دوی ښه مخته تللي. مونږ به د اوونۍ تر پایه وګورو، چې څه پېښېږي؟ خو دوی ښه مخته روان دي.»
د ټرمپ په وړاندیز شوې طرحه کې هغه موارد، چې د حماس او اسراییلو ترمنځ په مذاکراتو کې د خنډ په توګه يادېږي، له غزې په بشپړه توګه د اسراییلي ځواکونو نه وتل او د حماس بې وسلې کولو شرطونه دي.
یو شمېر اسراییلي رسنیو ته تایید کړې، چې د دغه هېواد ځواکونه به د غزې له هغو سیمو په شا نه شي، چې د اسراییلو امنیت ته ستراتیژیک ارزښت لري. بل لور د ملګرو ملتونو سرمنشي په غزې کې د دایمي اوربند او جګړې درېدو لپاره د ټرمپ د وړاندیز شوې طرحې تطبیق حیاتي ګڼي او پر ژر پلي کېدو یې ټینګار لري .
د ملګرو ملتونو سرمنشي انتونیو ګوټېریش وايي: « له دوو کلونو سختو ربړونو وروسته باید دا هېله ولرو، چې داسې یو موقع په لاس راغلې، څو دغه ناورین د امریکا ولسمشر ډونالډ ټرمپ د طرحې پر بنسټ پای ته ورسوو. دایمي اوربند او د یو باور وړ سیاسي بهیر رامنځته کول د سولې لپار لاره پرانېزي . ملګري ملتونه به د سولې له ملاتړ پرته بله لار انتخاب نه کړي. »
په غزې تړانګه کې د اسراییلو له خوا بریدونه لا هم دوام لري، چې له جمعې ورځې راهیسې دغلته بمباریو له سلو زیات فلسطینان شهیدان کړي او لسګونه نور ټپیان دي.
د راپورونو پر بنسټ اسراییلي پوځیانو په دې دوه کلنه جګړه کې د غزې نږدې ۹۰ سلنه عامه تاسیسات، استوګنځي او زیربینايي بنسټونه ویجاړ کړي دي.
