ګڼ شمېر ولایتونو کې د ارمان لوڼي غایبانه جنازه وشوه.
افغانستان کې په دویمه ورځ هم د ارمان لوڼي غایبانه جنازه او فاتحه وشوه.
د پښتون ژغورنې په ملاتړ بیلابیلو ولایتونو کې له نړیوالو غوښتنه شوې چې د کوزو پښتنو غږ واوري او پر پاکستان فشار راوړي چې حقوق یې ورکړي.
لاریون کوونکو پاکستانی ریاست د پښتنو قاتل یاد کړی او ټینګار يې کړی چې باید له دې عمل راوګرځي.
بلخ په شمال کې هغه ولایت دی چې مدني فعالانو په کې د ارمان لوڼي وژنه وغندله او د هغه لپآره یې غایبانه جنازه وکړه.
خلک د بلخ ادبي خوځښت له خوا رابلل شوي خو ښکاره پیغام یې دا دی چې د پښتونخوا له ولسونو سره به ولاړ وي.
له بلخ ها خوا په سویلي حوزه کې دا د هلمند مدني فعالان دي چې د ارمان لوڼي د فاتحې په مراسمو کې راټول شوي دي.
د دوی په باور د حق غوښتلو غږ د پنجاب له لورې په مرګ غلی شوی دی خو نړیوال یې باید ملاتړ وکړي.
د هېواد په ختیځ کونړ ولایت کې ځوانانو بیا د یو لاریون له لارې د پښتونخوا ولسونو ملاتړ وکړ.
ځوانانو چې د منظور پښتین په ملاتړ شعارونه ورکول له نړیوالې ټولنې یې وغوښتل چې د پښتون وژنې پرضد ودریږي.
خوست له کونړ وروسته په جنوب ختیز کې هغه ولایت دی چې ځوانانو یې پښتون وژنه وغندله او د پښتنو په یوالي یې ټینګار درلود.
ارمان لوڼی وړمه شپه د پاکستاني پولیسو له لوري په وهلو وهلو ووژل شو چې په نړیواله کچه یې غبرګونونه راپارولې دي.
د پاکستان له اړخه ډېر هغه ځوانان وژل شوي چې د لوی افغانستان چغه یې پورته کړې او یاهم د خپلو حقونو لپاره د پاکستاني حکومت پرخلاف راپورته شوي دي.
