د راپورونو له مخې، د پاکستان پخواني لومړي وزير عمران خان مېرمن بشرا بيبي او دوې خویندې یې په ایډياله زندان کې له شاوخوا ۹ میاشتو بند تېرولو وروسته، د اسلام آباد سترې محکمې له پرېکړې سره سم خوشې شوې دي.
د عمران خان مېرمنې له آزادېدو وروسته، د افغانستان سولې لپاره د امريکا پخواني ځانګړي استازي زلمي خلیلزاد د نوموړې پر خوشې کېدو خوښي څرګنده کړې او د پاکستان له حکومت یې غوښتي چې هر څه ژر د تحریک انصاف ګوند بنسټ اېښودونکی او د دې هېواد پخوانی لومړی وزیر عمران خان هم له زندانه آزاد کړي.
خلیلزاد له زندانه د عمران خان خوشې کول د پاکستان پر ګټه بللي.
خلیلزاد زیاته کړې: « زه خوشاله یم چې د عمران خان مېرمن او دوې خویندې له زندانه آزادې شوې دي. له دې وروسته باید عمران خان ژر آزاد شي. دغه کار به ډېر ښه اقدام وي او د پاکستان حکومت پر ګټه تمامېدلی شي.»
په پاکستان کې آزاد خبریالان وايي، د عمران خان پر وړاندې زیاتې قضیې ثبت شوې چې یو شمېر یې د حکومت له لوري څېړل شوې او یو شمېر نورې یې لا هم پاتې دي.
دوی د عمومي نظر پوښتنو او د عمران خان د پلویانو له قوله زیاتوي، عمران خان د پاکستان حکومت د سیاسي موخو لپاره زنداني کړی دی.
آزاد خبریال طاهرخان په دې اړه وايي: « هغوی دا تور لګوي، عمران خان هم او د هغه ګوند هم پر ده لګول شوي تورونه د سیاسي اهدافو لپاره بولي او کله نا کله د پوځ پر مشر باندې هم د هغه په اړه بیانونه ورکوي چې هغه هم د ده مخالف دی. په هر حال، په پاکستان کې عدالتونه او محکمې کله نا کله په آزادانه توګه هم پرېکړې کوي.»
بله خوا، د سیاسي چارو کارپوهان وايي، د پاکستان حکومت د امریکا په غوښتنه عمران له چین سره پر اړیکو او په خیبرپښتوا کې د ثبات ټینګولو په تور زندان ته اچولی.
د دوی په باور، له زندانه د خان د آزادېدولو لپاره د امریکا غوښتنه هم سیاسي اهداف لري.
د سیاسي چارو کارپوه عزیز معارج وايي: « که څه هم د عمران خان د حکومت ړنګېدل او د هغه بندي کېدل خپله د غرب په اشاره وشول، ځکه عمران خان په دوو جهتونو یو له روس او چین سره او خصوصا ً ډېرې نږدې اړیکې جوړې کړې او بل په قبایلي سیمو او د پښتنو او بلوڅو سیمو کې یې نه پرېښودل چې ظالمانه عملیات ترسره شي. حتا داسې ویل کېږي چې له بلوڅ آزادي غوښتونکو سره یې هم تفاهم درلود.»
عمران خان د تېر۲۰۲۳زکال د مې پر نهمه د اسلام آباد سترې محکمې مخې ته د پولیسو له خوا ونیول شو او د پنجاب ایالت اډیالې زندان کې بندي شو.
له دې وروسته د خان پلویانو په کراتو د هغه د آزادېدو لپاره لاریونونه وکړل او په زندان کې يې له نوموړي سره د ناسم چلن او ناسم روغتیايي وضعیت ادعاوې وکړې.
د پاکستان حکومت عمران خان د فساد د مختلفو قضیو په تور بندي کړی او تر اوسه یې د خوشې کولو په اړه د مسلم ليګ (ن) ګوند پر مشرۍ د پاکستان حکومت رسمي غبرګون نه دی ښودلی.
