د سې شنبې په ورځ په غزې کې د هغې جګړې دوه کاله پوره شول چې په خپله د حماس غورځنګ له خوا پر اسراییلو د ناڅاپي برېدونو له امله پيل شوې وه.
له دې بريد سره سم، اسراییلو د هوا او ځمکې له لارې پر غزې د پراخو پوځي عملیاتو پرېکړه اعلان کړه.
د الجزیرې ټلوېزیون د راپور پر بنسټ، پر اسرایيلو د حماس برید کې شاوخوا ۱۱۳۹ اسرایيليان ووژل شول او ۲۰۰ نور د ياد غورځنګ له لوري يرغمل ونیول شول، خو پر غزې د اسراییلي ځواکونو د خونړيو بریدونو د دوام په پایله کې تر اوسه څه باندې ۶۷ زره فلسطیني وګړي شهیدان او نږدې ۱۷۰ زره نور ټپیان شوي دي.
غزه کې د جګړې د دوو کلونو له پوره کېدو سره حماس غورځنګ ويلي، اسرایيل د اوږمهاله جګړې له لارې د فلسطينيانو نسل وژنې ته دوام ورکوي او غواړي له خپلې خاورې يې وباسي.
دې غورځنګ نړیوال او په ځانګړي توګه عربي هېوادونه تورن کړي چې په غزې کې يې له روان وضعیت سره خواخوږي او همکاري له شرمه ډکه وه.
حماس غورځنګ وړاندې ویلي: « اسراییلو د بې دفاع فلسطیني وګړو پر وړاندې خپل وحشي بریدونه دوامدار ساتلي. نړیواله ټولنه چوپه خوله ده او عربي هېوادونه په مرسته کولو کې ناکامه شوي.»
امريکا په دې جګړه کې دوه ډوله رول اداء کوي چې يو يې د جګړې د دوام لپاره د اسرایيلو تسليحاتي ملاتړ او بل يې د درولو لپاره د منځګړي رول دی. د جګړې درولو هڅو په لړ کې يې يوه شل ماده ييزه طرحه وړانديز کړې چې په اساس يې په مصر کې د حماس او اسرایيلو ترمنځ مذاکرات هم پيل شوي او له پرمختګونو سره مل دي.
د امریکا ولسمشر ډونالډ ټرمپ وايي: « دوی ښه مخته تللي. موږ به د اوونۍ تر پایه وګورو چې څه پېښېږي، خو دوی ښه مخته روان دي.»
د ټرمپ په وړاندیز شوې طرحه کې هغه موارد چې د حماس او اسراییلو ترمنځ په مذاکراتو کې د خنډ په توګه يادېږي، له غزې په بشپړه توګه د اسراییلي ځواکونو نه وتل او د حماس بې وسلې کولو شرطونه دي.
یو شمېر اسراییلي سرچینو رسنیو ته تایید کړې چې د دوی ځواکونه به د غزې له هغو سیمو په شا نه شي چې د اسراییلو امنیت ته سټراټیژیک ارزښت لري.
بله خوا، د ملګرو ملتونو سرمنشي په غزې کې د دایمي اوربند او جګړې درېدو لپاره د ټرمپ د وړاندیز شوې طرحې تطبیق حیاتي ګڼي او پر ژر پلي کېدو یې ټینګار کوي.
د ملګرو ملتونو سرمنشي انټونیو ګوټېرېش وايي: « له دوو کلونو سختو ربړونو وروسته باید دا هېله ولرو چې داسې یو موقع په لاس راغلې، ترڅو دغه ناورین د امریکا ولسمشر ډونالډ ټرمپ د طرحې پر بنسټ پای ته ورسوو. دایمي اوربند او د یو باور وړ سیاسي بهیر ایجاد د سولې لپار لاره پرانېزي. ملګري ملتونه به د سولې له ملاتړ پرته بله لار انتخاب نه کړي.»
دا په داسې حال کې ده چې په غزې تړانګه کې د اسراییلو له خوا بریدونه لا هم دوام لري. د جمعې له ورځې راهیسې هلته په اسراییلي بمباریو کې له سلو زیات فلسطینان شهیدان شوي او لسګونه نور ټپیان دي.
د راپورونو پر بنسټ، اسراییلي ځواکونو په دې دوه کلنه جګړه کې د غزې نږدې ۹۰ سلنه عامه تاسیسات، استوګنځایونه او زېربنايي بنسټونه ویجاړ کړي دي.
