سعودي د یمني وګړو د قحطۍ اصلي لامل حوثي یاغیان یادوي.
حوثي یاغیان حدیدې ته د مرستو د لړۍ مخه نیسي.
د سعودي ایتلاف ویاند وايي د ملګروملتونو د فشارونو سربیره هم حوثيان نه پریږدي چې د دغه سازمان خوراکي مرستې حدیدې ته ورسیږي.
ترکي المالکي په یوه خبري ناسته کې د یمني وګړو د قحطۍ اصلي مسوولین حوثي یاغیان وبلل.
سعودي ایتلاف وايي ملګرو ملتونو چې کومې مرستې حدیدې بندري ښار او د یمن نورو سیمو ته استولي، حوثیانو یې مخه نیولې ده.
د دغه ایتلاف ویاند ترکي الملکي وايي حوثیان د هغې کاروان مخه نیسي چې حدیدې ته خوراکي مرستې لیږدوي.
د سعودي ایتلاف ویاند ترکي الملکي داسې ویلي (( د ملګروملتونو د فشارونو سربیره هم نن موږ دا شواهد تر لاسه کړل چې حوثیانو د مرستو مخه نیولې ده. حوثیان حدیدې بندر کې دغه کارونونه درولي دي. هغوی له کړي تړون سرغړونه کړې ده. هغوی د یمنې وګړو د لوږې مسوول دي.))
الملکي زیاته کړه چې حوثیان به دې ته اړ کړي چې د دې ټولو کړنو مسوولیت په غاړه واخلي.
اخوا د حدیدې بندر چارواکي وايي له ۲۰۱۵ کال راپدیخوا ددې بندر واردات ۶۰ سلنه راټیټ شوي دي.
د حدیدې بندر مطبوعاتي مسوول عمر الجرموزي داسې ویلي (( له جګړې وړاندې به د حدیده بندر له لارې د یمن ۷۰ سلنه خوراکي توکي را واردیدل، اوس حالت ډیر تغییر کړی دی. په ۲۰۱۵ کال کې چې جګړه پیل شوې، له هغې راپدیخوا دا واردات ۶۰ سلنه راټیټ شوي دي.))
د ملګروملتونو د وروستیو راپورونو له مخې د یمن کابو نیم نفوس د لوږې او قحطۍ له سخت ګواښ سره مخ دی.
د ملګروملتونو د خوړو سازمان څو ځل وړاندې هم خبر داری ورکړی چې لرې نه ده چې یمن د ستر بشري ناورین قرباني شي.
