د هلمند اوسېدونکی۶۱ کلن حاجي عین الدین پنځه کاله وړاندې په خپل کلي کې د ځمکې ماین چاودنه کې له دواړو پښو محروم شو چې دامهال مرکز لښکرګاه کې د سره صلیب نړیوالي کمېټې د فزیکي بیارغونې مرکز کې مصنوعي پښې ترلاسه کوي.
دی دغو مصنوعو پښو ته هم خوښ دی او وايي، ستونزې به يې ورسره را کمې شي.
په پښو معلول عین الله وايي: « زه چې کله روغ وم، دوکانداري مې کوله، خو له پېښې وروسته ځای پرځای شوم. اوس چې سره صلیب مصنوعي پښې راکړې دي، کولی شم تر جومات او نورو ځایونو لاړ شم.»
د سره صلیب نړیوالې کمېټې د فزیکي بیارغونې مرکز کې چې معیوبینو او معلولینو ته مصنوعي غړي په کې جوړېږي، د ډېرو معلولانو ورسره د ژوند هیلي بیا را ژوندۍ شوې دي.
معلولان له یادو خدماتو خوښ دي او وایي، هېواد کې د دې ډول مرکزونو موجودیت یوه ستره اړتیا ده.
معلول ګلاب شاه وايي: « ما ټرافیکي حادثه وکړه او یوه پښه مې ماته شوه. بیا دلته راغلم او دوی مې پښتو ته قالبونه جوړ کړل، اوس په ښه کېدو یم.»
معلول محمد صابر وايي: « زه د اتو کالو ماشوم وم چې ماین را باندې وچاودېده او دواړه پښې مې پرې شوې.»
معلول جمعه خان وايي: « موږ له دولت غوښتنه کوو چې په کلیو او بانډو کې ناچاوده توکي او ماینونه پاک کړي.»
هلمند کې د سره صلیب نړیوالې کمېټې د فزیکي بیارغونې مرکز مسوولینو په خبره، تېر۲۰۲۵ زېږدیز کال کې يې د سوېلي زون او یو شمېر نورو ولایتونو تر ۱۹ زره زیاتو ناروغانو ته په بېلابیلو برخو کې خدمات وړاندې کړي چې ۴۰ سلنه يې ښځي او ماشومان دي.
دوی زیاتوي، تېرکال د هلمند په مرکز کې ۴۳۶ معلولینو ته مصنوعي غړي ورکول شوي او تر ۱۶۰۰ ډېرو نورو ته د اصلي غړیو ملاتړ وسایل ورکړل شوي دی.
هلمند کې سره صلیب کمېټې د فزیکي بیارغونې مرکز مسوول عبدالواحد نعیمي وايي: « په دې کسانو کې تر ۴۰ سلنو پورې ماشومان او ښځینه ناروغان دي. تر ۴۵ سلنو پورې بیا معلولین دي چې په چاودنو او حادثو کې یې د وجود غړي له لاسه ورکړي یا متضرر شوي دي.»
په ورته مهال، هلمند کې د سره صلیب مسوولین دا هم وايي چې دوی د معلولینو د درملنې ترڅنګ، په یاد ولایت کې د خلکو د ژوند ښه کولو لپاره بېلابیلې پروژې هم عملي کړې دي.
هلمند کې د سره صلیب نړیوالې کمېټې مسوول عبدالباقي حنیفي وايي: « د سره صلیب نړیواله کمېټه یوازې د فزیکي بیارغونې په برخه کې کار نه کوي بلکې د محابسو او بندیانو په برخه کې هم کار کوي، بېړني روغتیايي خدمات وړاندې کوي، د کانالونو او کارېزونو په پاکولو کې همکاري کوي، له یوبل لرې کورنیو ته د ملاقات زمینه برابروي او له بېرته راستنېدونکو کورنیو سره هم د سرې میاشتې په ملتیا، مرسته کوي.
هلمند کې د سره صلیب مرکز د معلولینو د درملنې ترڅنګ، هغوی ته د باسکېټبال لوبي لپاره یو جمنازیم هم جوړ کړی چې د معلولینو په خبره، د هغوی د تفریح لپاره یې ښه زمینه برابره کړې.
